साईमत, जळगाव , प्रतिनिधी
स्वत:चे आधी आत्मपरिक्षण करा. आपली शक्तीस्थाने, कमजोरी काय आहेत? दोन्ही जाणून घ्या. आपल्याला काय संधी आहेत आणि काय धोखे आहेत हे ही तपासा. त्यानंतर काय करायचे आहे त्याचा विचार करा. कोणकोणत्या गोष्टी टाळाव्या याबाबत डॉ. उदय निरगुडकर म्हणाले, नाऊमेद करणाऱ्या अनेक गोष्टी घडत असतात, पण त्याला बळी पडू नये. निसर्गाने प्रत्येकाला काही गुण दिलेले आहेत. नैराश्याचे शिकार होऊ नका, विफलतेची भावना मनात आणू नका. अयशस्वी झाल्यावर किंवा मागे पडल्यावर पक्षपात, अन्याय झाला – केला गेला, अशी भावना मनात येऊ शकते, अशा भावनांना अजिबात थारा देऊ नका. उलट जिगर दाखवा. यशस्वी व्यक्तीला यश का मिळाले? याचा अभ्यास करा.
जगातील सर्वोत्तम गोष्टीतून काय घ्यायचे त्याला महत्त्व आहे. तसेच एकाकीपण हा घातक असतो. त्यापासून दूर राहा. आयुष्यात रिलॅक्स व्हायला शिका. तणावमुक्त असल्याशिवाय काही साध्य करता येणार नाही. आयुष्याच्या शेवटच्या क्षणी निराशेच्या गर्तेत गेलेला माणूस सुद्धा बदलू शकतो. आयुष्य फक्त गुलाबाचा प्रवास नाही, आयुष्यात काटे आहे हा निराशावाद आहे, फक्त गुलाब आहे हा आशावाद आहे, पण गुलाबासोबत काटेही आहे हा प्रयत्नवाद आहे. तेव्हा आपण आशावादी अथवा निराशावादी न होता प्रयत्नवादी बना, असा सल्ला दीपस्तंभ फाऊंडेशनच्या सल्लागार मंडळावर असलेले ज्येष्ठ संपादक आणि विचारवंत डॉ.उदय निरगुडकर यांनी मनोबल प्रकल्पातील विद्यार्थ्यांना दिला.
दीपस्तंभ फाऊंडेशन मनोबल ग्रेट भेट उपक्रमांतर्गत रविवारी ते कुसुंबा येथील प्रकल्पात “Born To Win” या विषयावर जाहीर व्याख्यानात बोलत होते. या प्रसंगी व्यासपीठावर कवयित्री बहिणाबाई चौधरी उमवि व्यवस्थापन समिती सदस्य राजेंद्र नन्नवरे, संचालक डॉ.रुपेश पाटील, नुकतीच मंत्रालयात क्लर्क पदावर नेमणूक झालेली मनोबलची विद्यार्थिनी अनुराधा गेबड आणि यजुर्वेंद्र महाजन उपस्थित होते. कार्यक्रमाचे प्रास्ताविक यजुर्वेंद्र महाजन यांनी तर सूत्रसंचालन सौरभ बोबटे याने केले.
