साईमत भुसावळ प्रतिनिधी
मध्य प्रदेशातील कटनी जिल्ह्यातील अल्पवयीन तरुण – तरुणी रेल्वेने पळून जाण्याच्या प्रयत्नात असताना भुसावळ रेल्वे स्थानकावर रेल्वे सुरक्षा बलाने त्यांना ताब्यात घेत समतोल प्रकल्पाच्या स्वाधीन केले.
मध्य प्रदेशातील कटनी जिल्ह्यातील विजय राघवगढ (खलवारा) येथील १७ वर्षीय मुलगी व १६ वर्षांचा मुलगा शाळेतून कोणालाही काहिही न सांगता रेल्वेतून पसार होताना भुसावळ रेल्वे स्थानकावरील प्लॅटफार्म क्रमांक तीनवर आढळून आले, त्यांना रेल्वे सुरक्षा बलाच्या जवानांनी ताब्यात घेत विचारपूस करत ताब्यात घेतले होते.
दरम्यान, शाळेच्या ड्रेसवरच हे विद्यार्थी बाहेर पडले होते. विद्यार्थिनी व विद्यार्थी या दोघांनी मित्र असल्याचे सांगत आम्ही शाळेत कोणालाही काही न सांगता तेथून निघून आल्याचे सांगत सुरतला जात असल्याची कबुली दिली. आरपीएफ कुशवाह यांनी उपनिरीक्षक ए. के. तिवारी यांना ही माहिती दिली. तिवारी यांनी एनजीओ प्रतिभा महाजन व दीपक पाचपांडे यांच्याकडे दोघांना सोपवले.
