साईमत, नवापूर, प्रतिनिधी
तालुक्यातील खांडबारा गावातील आठवडे बाजारात चोरट्यांनी धुमाकूळ घातला असून दहशत कायम आहे. त्यामुळे चोरटे आठवडे बाजारात पोलिसांना खुले आव्हान देत असल्याचे दिसून येत आहे. खांडबारा येथे आठवडे बाजारात चोरीच्या घटनांना आळा घालण्यात स्थानिक पोलीस अपयशी ठरल्यामुळे चोरटे सक्रिय झाले आहेत. वारंवार आठवडे बाजारात चोऱ्यांच्या घटनांमध्ये वाढ झाली आहे. कधी महिलांच्या गळ्यातील मंगळसूत्र तर कधी चेन चोरट्यांकडून लंपास केले जात आहे. मागील काही महिन्यांपासून मोबाईल चोरटे तसेच काही महिलाही चोरी करत असल्याचे समोर आले आहे. तसेच नवापूर शहरात मोटरसायकल चोरीचे सत्र सुरु आहे.
शहरातील विविध भागात मोटरसायकल चोरीला गेल्या आहेत. खांडबारा येथील पटेल किराणा दुकानाच्या सीसीटीव्हीमध्ये एका चोरट्याने लंपास घटना सीसीटीव्हीमध्ये कैद झाली. घटनेत संबंधित चोरटा एका पिशवीचा आडोसा घेऊन मोगराणी गावातील किराणा व्यावसायिक किराणा खरेदी करत असतांना त्यांच्या खिशातून मोबाईल लंपास करण्याचा प्रयत्न करत असल्याचे दिसून आले. परंतु, मोबाईल चोरी करत असतांना मोबाईल हातामधून घसरून खाली कोसळल्याने व्यक्तीला चोरी करत असल्याचे लक्षात आले. चोरट्याला पकडण्याचा प्रयत्न केला. मात्र, तो निसटण्यात यशस्वी झाला.
पोलिसांना खाकीचा दरारा दाखवावा लागणार
मोबाईल चोरीला गेला नसला तरी आठवडे चोरीच्या घटनांमध्ये बाजारात वाढ झाली आहे. स्थानिक ग्रामस्थ परिसरातील शेतकरी बाजारहाट करण्यासाठी आलेल्या नागरिकांना यामुळे मनस्ताप सहन करावा लागत आहे. यामुळे पोलिसांना पुन्हा एकदा खाकीचा दरारा दाखवावा लागणार आहे. नवापूर व खांडबारा परिसरातून चोरांचा तपास पोलिसांनी तात्काळ लावा, अशी मागणी नागरिकांनी केली आहे.
