भुसावळ : प्रतिनिधी
शहरातील यावल रोडवरील गजानन महाराज मंदिराजवळ भरधाव वेगाने जाणारा ट्रक घरात शिरल्याने एकाचा जागी मृत्यू झाला असून तिघे जण जखमी झाल्याची घटना आज सकाळी घडली आहे.
याबाबत मिळालेली माहीती अशी की, शहरातील यावल रोडवरून नेहमीच अवजड वाहनांची वाहतूक होत असते. या रस्त्यावर अनेकदा लहानमोठे अपघात होत असतात. दरम्यान, आज सकाळी यावल रोडवरून भरधाव वेगाने धावणार्या एमएच46 एएफ 5554 क्रमांकाच्या मिनी ट्रकने आधी दोन जणांना कट मारले. यानंतर गजानन महाराज मंदिराच्या जवळ असणार्या घराला धडक दिली. या घरात दोन जण होते. त्यातील एकाचा जागीच मृत्यू झाला तर एक जण गंभीर जखमी झाला आहे. तर, रस्त्यावर कट मारल्याने देखील दोन जण जखमी झाले आहेत. शहरात भर दिवसा सुमारे अकराच्या सुमारास घडलेल्या या घटनेने खळबळ उडाली आहे.
या दुर्घटनेची माहिती मिळताच शहर पोलीस स्थानकाच्या पथकाने तातडीने घटनास्थळी धाव घेतली असून तपास सुरू केला आहे. दरम्यान, ट्रकचा चालक हा मद्यधुंद होता की काय ? यबाबातच चौकशी करण्यात येत आहे. तर रस्त्याला लागून असणार्या झोपडीवजा घरावर हा ट्रक आदळल्याने या घराचे मोठे नुकसान देखील झाले आहे. यावल रोडवरील असुरक्षित वाहतुकीचा मुद्दा यातून पुन्हा एकदा अधोरेखीत झाला आहे.
