साईमत / मुंबई
अंमली पदार्थ विरोधी कक्ष, गुन्हे शाखा मुंबईने शहरात विशेष मोहिम राबवत विविध ठिकाणी धडक कारवाई केली असून तब्बल 10 आरोपी अटकेसाठी घेण्यात आले आहेत. या कारवाईत 29.292 किलो अंमली पदार्थ जप्त करण्यात आले असून त्याची अंदाजे किंमत 10 कोटी 14 लाख 46 हजार 100 रुपये आहे.
पोलीस उपायुक्त नवनाथ ढवळे यांच्या नेतृत्वाखाली राबवलेल्या या कारवाईत 902 ग्रॅम एमडी (मेफेड्रोन), 20.700 किलो गांजा आणि 7.690 किलो हायड्रोपोनिक गांजा असा मोठा साठा हस्तगत करण्यात आला आहे. 1 एप्रिल ते 7 एप्रिल 2026 या कालावधीत वडाळा, अंधेरी, बांद्रा, मालाड, नागपाडा, घाटकोपर, धारावी, माहिम, गोरेगाव यांसारख्या ठिकाणी छापेमारी करण्यात आली.
वडाळा बीपीटी रोड परिसरात एमडी विक्री करणाऱ्या आरोपीकडून 218 ग्रॅम एमडी जप्त करण्यात आली, तर विलेपार्ले परिसरातून 7.690 किलो हायड्रोपोनिक गांजा हस्तगत झाला. वडाळा टीटी परिसरातून 20.700 किलो गांजा, नागपाडा भागातून 117 ग्रॅम एमडी जप्त झाली. गोरेगाव, धारावी, अंधेरी आणि माहिम येथील कारवाईत 281 ग्रॅम एमडी जप्त करण्यात आले, तर बांद्रा व मालाड परिसरातून अनुक्रमे 163 ग्रॅम आणि 123 ग्रॅम एमडी जप्त झाली आहे.
या सर्व प्रकरणांमध्ये एनडीपीएस कायद्यान्वये गुन्हे दाखल करण्यात आले असून पुढील तपास संबंधित युनिटकडून सुरू आहे. अंमली पदार्थ विरोधी कक्षाच्या विशेष मोहिमेमुळे मुंबईतील ड्रग्ज नेटवर्कवर मोठा आघात झाला असून शहर अंमली पदार्थमुक्त करण्यासाठी पोलीस प्रशासन सतर्क आहे.
