ट्रॅक्टर चालकाने पथकाला पाहताच वाळूने भरलेले ट्रॅक्टर घेऊन पळ काढला
साईमत/जळगाव/ वाकडी /प्रतिनिधी
जळगाव तालुक्यातील वाकडी गावातून अवैध वाळूची वाहतूक करण्याचा प्रयत्न करणाऱ्या ट्रॅक्टरवर महसूल पथक कारवाईसाठी गेले असता चालक पसार झाला. ही घटना सोमवारी, १६ फेब्रुवारी रोजी सकाळी साडे-दहा वाजेच्या सुमारास घडली.
जळगाव तालुका महसूल पथकाला वाकडी गावातून अवैध वाळू वाहतूक होत असल्याची माहिती मिळाल्यानंतर पोलीस पाटील विठ्ठल काशीनाथ पाटील आणि महसूल सेवक रामदास मंगा भंगाळे हे पथक कारवाईसाठी रवाना झाले होते. पथकाने जप्ती करण्याचा प्रयत्न केला, मात्र ट्रॅक्टर चालकाने पथकाला पाहताच वाळूने भरलेले ट्रॅक्टर घेऊन त्वरित पळ काढला.
याबाबत रात्री १० वाजता एमआयडीसी पोलीस ठाण्यात पोलीस पाटील विठ्ठल पाटील यांनी दिलेल्या फिर्यादीवरून ट्रॅक्टर चालक सिताराम शिवा पाटील (रा. कुऱ्हाळदे) आणि बापू गोविंदा पाटील (रा. वाकडी) यांच्याविरुद्ध गुन्हा दाखल करण्यात आला आहे. सध्या पुढील तपास पोहेकॉ किरण पाटील करीत आहेत.
पोलिसांची सूचना महसूल आणि पोलीस पथक यांचे निरीक्षण सतत सुरू असून, अवैध वाळू वाहतूक करणाऱ्यांविरुद्ध कठोर कारवाई केली जाईल, असे पोलिसांनी सांगितले.
ही घटना स्थानिक प्रशासनासाठी इशारा म्हणून समोर आली आहे, की वाळूमाफियाच्या कारवाया रोखण्यासाठी अधिक सक्रियता आवश्यक आहे.
