महावितरणचे १३२ केव्ही क्षमतेचे सबस्टेशन धोका टळला
साईमत/धरणगाव/प्रतिनिधी
धरणगाव-चोपडा रोडवरील औद्योगिक वसाहतीत आज दुपारच्या सुमारास एका भंगार गोडाऊनला लागलेल्या भीषण आगीने परिसरात एकच खळबळ उडवून दिली. प्राथमिक माहितीनुसार, शॉर्टसर्किटमुळे ही आग लागल्याचा अंदाज व्यक्त केला जात असून, गोडाऊनमधील मोठ्या प्रमाणावरील भंगार साहित्य जळून खाक झाले आहे. सुदैवाने या दुर्घटनेत कोणतीही जीवितहानी झाली नसली तरी मालमत्तेचे मोठे नुकसान झाले आहे.
आग लागल्यानंतर काही क्षणांतच ज्वाळांनी रौद्ररूप धारण केले. आकाशात उसळणारे काळ्या धुराचे लोट आणि आगीचे प्रचंड लोळ दूरवरून दिसत होते. त्यामुळे औद्योगिक वसाहतीसह आसपासच्या परिसरात भीतीचे वातावरण निर्माण झाले. नागरिकांमध्ये घबराट पसरली असून अनेकांनी सुरक्षिततेच्या दृष्टीने परिसर रिकामा केला.
या घटनेतील सर्वात धोकादायक बाब म्हणजे आग लागलेल्या ठिकाणाच्या अगदी जवळच महावितरणचे १३२ केव्ही क्षमतेचे सबस्टेशन आहे. आगीच्या ज्वाळा सबस्टेशनपर्यंत पोहोचल्या असत्या, तर संपूर्ण शहराचा वीजपुरवठा खंडित होण्याबरोबरच मोठा स्फोट होऊन जीवितहानीची शक्यता निर्माण झाली असती. मात्र अग्निशमन दलाच्या तत्परतेमुळे ही संभाव्य दुर्घटना टळली.
आगीची माहिती मिळताच धरणगाव नगरपालिकेचा अग्निशमन बंब तात्काळ घटनास्थळी दाखल झाला. आगीची तीव्रता लक्षात घेता शेजारील अमळनेर व एरंडोल येथूनही अग्निशामक दलाला पाचारण करण्यात आले. तिन्ही ठिकाणच्या अग्निशमन पथकांनी समन्वयाने शर्तीचे प्रयत्न करत आगीवर नियंत्रण मिळविण्यास सुरुवात केली. सध्या युद्धपातळीवर आग आटोक्यात आणण्याचे काम सुरू असून, परिस्थिती नियंत्रणात येत असल्याची माहिती मिळाली आहे.
घटनास्थळी बघ्यांची मोठी गर्दी उसळली होती. पोलिस प्रशासनाने तत्काळ बंदोबस्त ठेवत नागरिकांना सुरक्षित अंतर राखण्याचे आवाहन केले. स्थानिक नागरिकांनीही मदतकार्याला सहकार्य केले. आग नेमकी कशामुळे लागली याबाबत अधिकृत तपास सुरू असून, नुकसानीचा पंचनामा करण्यात येणार असल्याची माहिती प्रशासनाकडून देण्यात आली.
धरणगाव औद्योगिक वसाहतीतील ही घटना शहरासाठी इशारा ठरली असून, औद्योगिक भागातील अग्निसुरक्षा उपाययोजनांचा पुनर्विचार करण्याची गरज अधोरेखित झाली आहे.
