भाजपाचे जिल्हा सरचिटणीस अरुण धोबी यांची मागणी
साईमत/शिरपूर/प्रतिनिधी :
‘आपले सरकार’ सेवा केंद्रातून मिळणाऱ्या विविध प्रमाणपत्रांच्या शुल्कात दुपटीने वाढ करण्यात केली आहे. जात आणि नॉन क्रिमीलेअर प्रमाणपत्रासाठी आता १२८ रुपये मोजावे लागत आहेत. ही दरवाढ शैक्षणिक वर्ष सुरुवात होत असतानाच लागू झाल्याने विद्यार्थ्यांसह सर्वसामान्यांना मोठा आर्थिक भुर्दंड बसत आहे. धुळे भाजपाचे जिल्हा सरचिटणीस अरुण धोबी यांनी मुंबईला मंत्रालयात भाजपाचे प्रदेशाध्यक्ष तथा राज्याचे महसूल मंत्री ना. चंद्रशेखर बावनकुळे यांची नुकतीच भेट घेऊन प्रमाणपत्रे, दाखल्यांच्या शुल्कात झालेली वाढ कमी करावी, अशा आशयाची मागणी निवेदनाद्वारे केली आहे.
निवेदनात नमूद केले आहे की, आता शाळा, काॅलेज, महाविद्यालय सुरू झाली आहेत. जात, उत्पन्न, नॉन क्रीमिलेअर, नॅशनलिटी, रहिवासी अशा विविध प्रमाणपत्रांची विद्यार्थ्यांना आवश्यकता असते. त्यामुळे विद्यार्थ्यांसह पालकांची सेवा केंद्रांमध्ये मोठ्या प्रमाणावर गर्दी होत आहे. त्यातच प्रमाणपत्रांच्या शुल्कात अचानक मोठ्या प्रमाणात वाढ झाल्याने सर्वसामान्य नागरिकांना त्याचा फटका सहन करावा लागत आहे. यापूर्वी एका प्रमाणपत्रासाठी साधारण ३३.६० ते ५७.२० रुपये एवढे शुल्क होते. मात्र, एप्रिलपासून नव्या दरांची अंमलबजावणी सुरू झाली आहे.
दरवाढ कमी करुन विद्यार्थ्यांना दिलासा द्यावा
शाळा, काॅलेज, महाविद्यालयात विद्यार्थ्यांना जात, उत्पन्न, नॉन क्रीमिलेअर, नॅशनॅलिटी, रहिवासी अशा विविध प्रमाणपत्रांची आवश्यकता असते. मात्र, सर्व प्रमाणपत्रांच्या शुल्कातील दरवाढीमुळे विद्यार्थ्यांसह नागरिकांमध्ये नाराजी आहे. प्रमाणपत्राची झालेली दरवाढ कमी करुन विद्यार्थ्यांना दिलासा द्यावा, अशी मागणी अरुण धोबी यांनी महसूल मंत्र्यांजवळ करुन याविषयी सविस्तर चर्चा केली.
