मोबाईल लिंक हॅकिंग: शेतकऱ्याच्या खात्यातून लाखो रुपयांची चोरी
साईमत /चाळीसगाव/ प्रतिनिधी
चाळीसगाव तालुक्यातील पाटणा येथील रहिवासी महेश ईश्वर जामदार (वय ३१) यांचे बँक खाते अज्ञात सायबर चोरट्याने हॅक करून तब्बल ५ लाख ४९ हजार ४०१ रुपयांची आर्थिक फसवणूक केली आहे. ही धक्कादायक घटना समोर आल्यानंतर जामदार यांनी तात्काळ सायबर पोलीस ठाण्यात तक्रार नोंदवली असून गुन्हा मंगळवारी १७ मार्च रोजी दुपारी ५ वाजता नोंदवण्यात आला.
सेंट्रल बँक ऑफ इंडियाच्या स्टेशन रोड शाखेत असलेल्या जामदार यांच्या बचत खात्याशी त्यांचा मोबाईल क्रमांक लिंक होता. २१ फेब्रुवारी ते २७ फेब्रुवारी २०२६ या काळात अज्ञात चोरट्याने हा मोबाईल क्रमांक हॅक केला आणि त्याद्वारे बँक खात्याचा ताबा मिळवला.
हॅकिंगनंतर चोरट्याने जामदार यांच्या खात्यातील पैसे वेळोवेळी विविध बँक खात्यांमध्ये ट्रान्सफर केले. काही दिवसांतच ५ लाख ४९ हजार ४०१ रुपयांची रक्कम जामदार यांच्या खात्यातून गायब झाली. आर्थिक नुकसान झाल्याचे लक्षात येताच जामदार यांनी त्वरित सायबर पोलिसांकडे धाव घेतली.
सायबर पोलीसांनी अज्ञात व्यक्तीविरोधात फसवणुकीचा गुन्हा दाखल केला असून, पुढील तपास सुरु आहे. पोलिसांचे म्हणणे आहे की, या प्रकारात हॅकिंग आणि ऑनलाईन फसवणूक झाल्यामुळे नागरिकांनी आपले बँक खाते व मोबाईल नंबर सुरक्षित ठेवण्याचे विशेष लक्ष द्यावे.
