साईमत, मुक्ताईनगर : प्रतिनिधी
गेल्या आठ महिन्यापासून रिक्त असलेल्या मुक्ताईनगरला अखेर तहसीलदार म्हणून गिरीश वखारे यांची नियुक्ती राज्य शासनाच्या महसूल विभागाने १५ फेब्रुवारी रोजी अध्यादेश काढून केलेली आहे. आगामी लोकसभा सार्वत्रिक निवडणुकीच्या अनुषंगाने तहसीलदार संवर्गातील अधिकाऱ्यांच्या बदल्या राज्य शासनाच्या महसूल विभागाने केलेल्या आहे. त्यामध्ये श्री.वखारे यांचाही समावेश आहे. गिरीश वखारे हे तळोदा तहसील कार्यालय जिल्हा नंदुरबार येथे कार्यरत होते. गेल्या आठ महिन्यातील नियुक्त झालेले चवथे मुक्ताईनगर तहसीलदार श्री.वखारे यांनी १९ मार्च रोजी पदभार स्वीकारला आहे. श्री.वखारे यांनी २०१० मध्ये मुक्ताईनगर तहसीलमध्ये प्रशिक्षणार्थी तहसीलदार म्हणून काम केलेले आहे.
मुक्ताईनगरच्या तत्कालीन तहसीलदार श्‍वेता संचेती यांची १२ जून २०२३ रोजी त्र्यंबकेश्‍वर, जि.नाशिक येथे बदली झाल्यानंतर येथील तहसिलदारांचे पद रिक्त होते. त्यामुळे नागरिकांना अनेक अडचणींना सामोरे जावे लागत होते. गेल्या आठ महिन्यांमध्ये चौथ्यांदा शासनाच्या महसूल विभागाने नियुक्ती केलेले नूतन तहसीलदार गिरीश वखारे यांनी पदभार स्वीकारला आहे.
राजकीय दृष्ट्या संवेदनशील असलेल्या मुक्ताईनगर तालुक्यातील अवैध वाळू वाहतूक व्यवसायाला नवीन तहसीलदार यांच्याकडून आळा बसेल का? याकडे लक्ष लागून राहणार आहे. गेल्या आठ महिन्यापासून मुक्ताईनगर येथील निवासी नायब तहसीलदार डॉ. निकेतन वाडे यांनी प्रभारी तहसीलदार म्हणून पदभार सांभाळला होता.
