आशियाई योगासन स्पर्धेत डॉ. शरयू विसपुतेंना सुवर्णपदक
जळगाव (प्रतिनिधी )
दुसऱ्या आशियाई योगासन चॅम्पियनशिपमध्ये भारताच्या डॉ. शरयू विसपुते यांनी उत्कृष्ट योग कौशल्याचे प्रदर्शन करत सुवर्णपदक जिंकले आहे. नवी दिल्ली येथे झालेल्या या स्पर्धेत त्यांनी ‘सिनियर बी’ गटात पारंपरिक फॉरवर्ड बेंडिंग योगासनांच्या प्रकारात २१ आशियाई देशांतील स्पर्धकांना पराभूत करत हे यश मिळवले.
भारताचे प्रतिनिधित्व करताना डॉ. शरयू यांनी अचूक योगासन शैली आणि लयबद्ध हालचालींनी जजेसना प्रभावित केले. पारंपरिक फॉरवर्ड बेंडिंग योगासनांवरील त्यांचे प्रभुत्व आणि प्रत्येक मुद्रेतील सफाई यामुळे त्यांना प्रतिस्पर्धकांवर मात करणे शक्य झाले. आशिया खंडातील २१ देशांच्या योग साधकांनी या स्पर्धेत भाग घेतला होता, ज्यात डॉ. शरयू यांनी आपल्या वयोगटात अव्वल स्थान पटकावले.
डॉ. शरयू यांनी आंतरराष्ट्रीय स्तरावर भारतीय योगासनांची श्रेष्ठता पुन्हा सिद्ध केली आहे. कठोर परिश्रम, योगासनांप्रति समर्पण आणि निष्ठा यांमुळेच त्यांना हे यश प्राप्त झाले आहे. आंतरराष्ट्रीय स्तरावर भारताची प्रतिष्ठा वाढली आहे.
डॉ. शरयू विस्पुते यांनी यापूर्वीही अनेक योगासन स्पर्धांमध्ये सक्रिय सहभाग घेतला आहे. त्यांनी राज्यातील योग स्पर्धांमध्ये परीक्षक म्हणूनही भूमिका बजावली आहे. सध्या त्या महाराष्ट्र योग शिक्षक संघाच्या उपाध्यक्ष असून, वैद्यकीय व्यवसाय सांभाळून त्या योगासनांचा प्रसार करण्यासाठी सतत प्रयत्नशील असतात.
