तांदूळ विकणाऱ्या अंगणवाडीसेविकेसह मदतनिसावर गुन्हा
जळगांव (प्रतिनिधी)-
जामनेर तालुक्यातील देऊळगाव गुजरी येथील ० ते ३ वर्षे वयोगटातील अंगणवाडीच्या बालकांना पुरवठा करण्यात येणाऱ्या तांदळाची परस्पर विक्री झाल्याचे ग्रामस्थांच्या लक्षात आले होते. हा तांदुळ खरेदी करणाऱ्या दोघांना ग्रामस्थांनी रंगेहाथ पकडून फत्तेपूर पोलिसांच्या ताब्यात दिले.
प्रभारी बाल विकास प्रकल्प अधिकारी भारती भिसे यांनी अंगणवाडी पर्यवेक्षिका ज्योती कदम यांचेसह फत्तेपूर पोलीस ठाण्यात फिर्याद दिली आहे.देऊळगावगुजरी येथील अंगणवाडी सेविका लता मोरे व मदतनिस ज्योती माळी यांनी संगनमत करून अंगणवाडी शालेय पोषण आहाराचा ११२ किलो तांदूळ किंमत फत्तेपूर येथील साहिल कुरेशी व जुबेर कुरेशी यांना विक्री केला. ही बाब ग्रामस्थांच्या लक्षात आल्यानंतर त्यांनी फत्तेपूर पोलीस स्टेशनला कळविले. पोलीस घटनास्थळी दाखल झाले.
पंचनामा करून मुद्देमालासह तांदुळ खरेदी करणाऱ्यांना ताब्यात घेतले. त्यांनी मदतनिस व सेविका यांनी तांदूळ विकल्याची कबूली दिली.
स.पो.निरीक्षक गणेश फड यांनी गट विकास अधिकारी श्रीकृष्ण इंगळे यांच्याशी संपर्क साधला. प्रभारी बालविकास प्रकल्प अधिकारी भारती भिसे व पर्यवेक्षिका ज्योती कदम यांनी दिलेल्या फिर्यादीवरून फत्तेपूर पोलीस ठाण्यात गुन्हा दाखल झाला तपास स.पो.नि.गणेश फड, हेड कॉ . प्रविण चौधरी, गनी तडवी करीत आहेत.
