एमआयडीसी पोलीस ठाण्यातील कॉन्स्टेबलने घेतला गळफास
साईमत/चाळीसगाव / प्रतिनिधी
जळगाव जिल्हा पोलीस दलात खळबळ उडवून देणारी घटना समोर आली असून जळगाव एमआयडीसी पोलीस ठाण्यात कार्यरत असलेल्या एका पोलीस कॉन्स्टेबलने गळफास घेऊन आत्महत्या केल्याची धक्कादायक घटना उघडकीस आली आहे. या घटनेमुळे पोलीस दलासह परिसरात हळहळ व्यक्त केली जात आहे.
निलेश पाटील असे आत्महत्या केलेल्या पोलीस कर्मचाऱ्याचे नाव असून ते चाळीसगाव तालुक्यातील कोदगाव येथील रहिवासी होते. रविवारी त्यांच्या राहत्या घरात गळफास घेतलेल्या अवस्थेत त्यांचा मृतदेह आढळून आल्याने कुटुंबीयांना मोठा धक्का बसला. घटनेची माहिती मिळताच परिसरात एकच खळबळ उडाली.
मिळालेल्या माहितीनुसार, निलेश पाटील हे जळगाव एमआयडीसी पोलीस ठाण्यात कार्यरत होते. दरम्यान, कोदगाव येथील त्यांच्या राहत्या घरी त्यांनी गळफास घेतल्याचे समोर आले. कुटुंबीयांच्या लक्षात हा प्रकार आल्यानंतर तातडीने स्थानिक पोलिसांना कळविण्यात आले.
घटनेची माहिती मिळताच चाळीसगाव पोलिसांनी घटनास्थळी धाव घेतली. पंचनामा करून निलेश पाटील यांचा मृतदेह खाली उतरवून शवविच्छेदनासाठी चाळीसगाव येथील ग्रामीण रुग्णालयात पाठविण्यात आला.
दरम्यान, घटनास्थळी पोलिसांना कोणतीही सुसाईड नोट आढळून आलेली नाही. त्यामुळे त्यांनी हे टोकाचे पाऊल का उचलले, यामागचे नेमके कारण अद्याप स्पष्ट झालेले नाही. निलेश पाटील हे नैराश्यात होते का किंवा कोणत्या तणावाखाली होते का, याबाबत पोलिसांकडून तपास सुरू आहे.
या दुर्दैवी घटनेमुळे जिल्हा पोलीस दलात शोककळा पसरली असून सहकारी पोलीस कर्मचाऱ्यांकडून हळहळ व्यक्त करण्यात येत आहे. दरम्यान, चाळीसगाव पोलीस या प्रकरणाचा पुढील तपास करत आहेत.
