​मोदी सरकारची १२ वर्षे : विश्वास, विकास आणि जन कल्याणाचा अभूतपूर्व प्रवास!

साईमत -जळगाव- प्रतिनिधी |
​”पंतप्रधान नरेंद्र मोदी यांच्या नेतृत्वाखालील केंद्र सरकारने गेल्या १२ वर्षांत केवळ देशाचा चेहरामोहराच बदलला नाही, तर भारताला आत्मनिर्भरतेच्या नव्या शिखरावर नेऊन ठेवले आहे. हा प्रवास केवळ आकडेवारीचा नसून देशातील गरीब, शेतकरी, तरुण आणि महिलांच्या सक्षमीकरणाचा आहे,” असा ठाम विश्वास केंद्रीय युवा व क्रीडा राज्यमंत्री नामदार रक्षाताई खडसे यांनी आज येथे व्यक्त केला.
​मोदी सरकारच्या १२ वर्षांच्या कार्यकाळातील कामगिरी आणि ऐतिहासिक निर्णयांची माहिती देण्यासाठी जळगावात एका विशेष पत्रकार परिषदेचे आयोजन करण्यात आले होते. या प्रसंगी त्या बोलत होत्या. या पत्रकार परिषदेला जळगाव लोकसभेच्या खासदार स्मिताताई वाघ, जळगाव शहराचे आमदार सुरेश भोळे (राजू मामा), पश्चिम जिल्हाध्यक्ष डॉ. राधेश्याम चौधरी, महानगर जिल्हाध्यक्ष दीपक सूर्यवंशी, माजी महापौर दीपमालाताई काळे, जिल्हा प्रसिद्धीप्रमुख मनोज भांडारकर व विजय वानखेडे यांची प्रमुख उपस्थिती होती.

​डिजिटल गव्हर्नन्सने वाचवले ४.३१ लाख कोटी; ‘रेड कॉरिडॉर’ आता ‘ग्रीन झोन’
​पत्रकार परिषदेत बोलताना नामदार रक्षाताई खडसे म्हणाल्या की, २०१४, २०१९ आणि त्यानंतर २०२४ मध्ये सलग तिसऱ्यांदा जनतेने मोदी सरकारवर अढळ विश्वास दाखवला आहे. सरकारचा ‘सबका साथ, सबका विकास, सबका विश्वास’ हा मंत्र आता जनआंदोलन बनला आहे.भ्रष्टाचाराला चाप: तंत्रज्ञान आणि थेट बँक खात्यात (DBT) पैसे पाठवण्याच्या पद्धतीमुळे लाखो बनावट लाभार्थी यंत्रणेतून बाहेर पडले. यामुळे देशाच्या तिजोरीची तब्बल ४.३१ लाख कोटी रुपयांची बचत झाली आहे.
​सुरक्षित भारत: सर्जिकल स्ट्राईक आणि हवाई हल्ल्यांमुळे जगाला भारताच्या ताकदीची जाणीव झाली. प्रबळ इच्छाशक्तीमुळे देशातील नक्षलवाद संपुष्टात आला असून पूर्वीचा ‘रेड कॉरिडॉर’ आता ‘ग्रीन ग्रोथ झोन’मध्ये बदलला आहे.
​गरीब कल्याण: गेल्या काही वर्षांत सरकारच्या कल्याणकारी योजनांमुळे जवळपास २५ कोटी नागरिक दारिद्र्यरेषेच्या वर आले आहेत.
​योजनांचा महापूर: शेवटच्या घटकांपर्यंत पोहोचला लाभ

योजनेचे नावएकूण लाभार्थी / कामगिरी
जन धन योजना५८ कोटींहून अधिक बँक खाती (३२ कोटी महिला)
मोफत रेशन८१ कोटींहून अधिक नागरिकांना अविरत पुरवठा
आयुष्मान भारत६० कोटींहून अधिक आरोग्य कार्ड जारी
पंतप्रधान आवास योजना४ कोटींहून अधिक पक्की घरे मंजूर
जल जीवन मिशन१६ कोटींहून अधिक ग्रामीण कुटुंबांना नळाचे पाणी
उज्ज्वला योजना११ कोटी महिलांना मोफत गॅस कनेक्शन
स्वच्छ भारत मिशन१२ कोटींहून अधिक शौचालयांची निर्मिती

शेतकरी आणि मध्यमवर्गाला मोठा दिलासा
“पंतप्रधान किसान सन्मान निधीअंतर्गत ११ कोटी शेतकऱ्यांच्या खात्यात ४.३ लाख कोटी जमा झाले आहेत. तर किसान क्रेडिट कार्डची मर्यादा ३ लाखांवरून ५ लाख केली आहे. दुसरीकडे, कर सवलतीची मर्यादा थेट १२.७५ लाख रुपयांपर्यंत वाढवून मध्यमवर्गाला सरकारने मोठी भेट दिली आहे,” असे रक्षाताईंनी नमूद केले.
​पायाभूत सुविधांचा वेगाने विकास; ‘चप्पल घालणाराही करतोय विमानप्रवास’
​गेल्या १२ वर्षांत पायाभूत सुविधांच्या क्षेत्रात देशात क्रांती झाली असल्याचे सांगत त्यांनी ग्रामीण रस्त्यांपासून ते मेट्रो आणि विमानतळांपर्यंतच्या विकासाचा आढावा घेतला.
​रस्ते विकास: अटलजींनी सुरू केलेल्या ग्रामीण सडक योजनेअंतर्गत ८ लाख किमीचे रस्ते बांधले गेले, ज्यातील ४ लाख किमीचे रस्ते केवळ गेल्या १२ वर्षांत झाले आहेत. राष्ट्रीय महामार्गांचे जाळे २०१४ मधील ९१,२८७ किमीवरून आता १.४६ लाख किमीवर पोहोचले आहे. रस्ते बांधणीचा वेग दररोज ३४ किमी झाला आहे.
​रेल्वे आणि मेट्रोचा कायापालट: भारतीय रेल्वेचे ९९.६% विद्युतीकरण पूर्ण झाले असून १६४ वंदे भारत ट्रेन धावत आहेत. २०१४ मध्ये केवळ ५ शहरांत असलेली मेट्रो आज २६ हून अधिक शहरांमध्ये (१,०९५ किमी) धावत आहे.
​विमानतळांची सेंच्युरी: देशातील विमानतळांची संख्या ७४ वरून १६४ च्या पार गेली आहे. ‘उडान’ योजनेमुळे सर्वसामान्य नागरिकही आता विमानप्रवास करू लागला आहे.
​डिजिटल क्रांती: २.१४ लाख ग्रामपंचायतींना भारतनेट ब्रॉडबँडने जोडले गेले आहे, तर आरोग्य क्षेत्रात २३ नवीन एम्स रुग्णालयांना मंजुरी देण्यात आली आहे.

​”मोदी सरकारने विकासासोबतच देशाच्या सांस्कृतिक वारशाचे जतन केले आहे,” असे सांगत त्यांनी ‘कर्तव्य पथ’, ‘स्टॅच्यू ऑफ युनिटी’, नवीन संसद भवन आणि अंदमानमधील २१ बेटांना परमवीर चक्र विजेत्यांची नावे देण्याच्या ऐतिहासिक निर्णयांचा उल्लेख केला.
​जागतिक स्तरावर ‘लस मैत्री’च्या माध्यमातून ९९ देशांना मदत करणारा भारत आज ‘ग्लोबल सोल्यूशन प्रोव्हायडर’ बनला आहे. ७० लाख कोटींहून अधिक थेट परकीय गुंतवणूक (FDI) हा भारतावरील जागतिक विश्वासाचा पुरावा आहे.

​पत्रकार परिषदेच्या शेवटी एक महत्त्वाचा मुद्दा मांडताना केंद्रीय राज्यमंत्री रक्षाताई खडसे म्हणाल्या की, १० जून रोजी भारताच्या लोकशाहीत एक अभूतपूर्व इतिहास रचला गेला आहे. पंतप्रधान नरेंद्र मोदी हे देशाचे पहिले पंतप्रधान पंडित जवाहरलाल नेहरू यांना मागे टाकून, भारताच्या इतिहासातील सर्वाधिक काळ पदावर राहिलेले निर्वाचित पंतप्रधान बनले आहेत. ‘मॉर्निंग कन्सल्ट’च्या सर्वेक्षणात ७५% पसंती रेटिंगसह ते जगातील सर्वात लोकप्रिय नेते ठरले असून ही प्रत्येक भारतीयासाठी अभिमानास्पद बाब आहे.