‘दामिनी पथक’च्या उपस्थितीने खळबळ
साईमत/जळगाव/ प्रतिनिधी :
शहरातील विद्यार्थ्यांच्या सर्वाधिक वर्दळीच्या परिसरांपैकी एक असलेल्या एम. जे. कॉलेज परिसरात आज पोलिसांनी काही कॅफेंवर अचानक धडक कारवाई करत मोठी खळबळ उडवली. या कारवाईमुळे परिसरातील कॅफे चालकांमध्ये भीतीचे वातावरण निर्माण झाले असून, संपूर्ण भागात पोलिसांच्या हालचालींमुळे तणावाचे वातावरण दिसून आले.
ही कारवाई जिल्ह्याचे पोलीस अधीक्षक श्रीकांत धिवरे यांच्या मार्गदर्शनाखाली राबविण्यात आली. महाविद्यालय परिसरात काही कॅफेंमध्ये नियमभंग आणि संशयास्पद गैरप्रकार सुरू असल्याच्या तक्रारींच्या पार्श्वभूमीवर ही विशेष मोहीम आखण्यात आली होती.
या मोहिमेचे नियोजन नितीन गणापुरे यांनी केले होते. त्यांच्या नेतृत्वाखाली विशेष पोलिस पथक तयार करण्यात आले होते. या पथकात पोलीस कर्मचारी अवेश शेख, प्रणय पवार आणि अमोल ठाकूर,रवींद्र जाधव यांचा समावेश होता.
या कारवाईतील विशेष बाब म्हणजे, महिलांच्या सुरक्षिततेसाठी कार्यरत असलेले ‘दामिनी पथक’ देखील या मोहिमेत सहभागी झाले होते. दामिनी पथकाच्या उपस्थितीमुळे कॅफेंमध्ये सुरू असलेल्या गैरप्रकारांवर आणि विशेषतः ‘कपल बॉक्स’सारख्या सुविधांवर पोलिसांची काटेकोर नजर असल्याचे स्पष्ट झाले.
महाविद्यालय परिसरात मोठ्या प्रमाणावर विद्यार्थी-विद्यार्थिनींची ये-जा असते. त्यामुळे अशा ठिकाणी कायदा-सुव्यवस्था राखणे आणि गैरप्रकारांना आळा घालणे आवश्यक असल्याचे पोलिसांचे म्हणणे आहे. या पार्श्वभूमीवर ही धडक मोहीम राबवण्यात आली.
छापा टाकलेल्या कॅफेंची पोलिसांकडून सखोल झडती घेण्यात आली असून, काही कॅफेंमधील संशयास्पद बाबींची नोंद करण्यात आली आहे. पुढील कायदेशीर कारवाई सुरू असून, या कारवाईनंतर परिसरातील इतर कॅफे चालकांमध्येही मोठी सतर्कता निर्माण झाली आहे.
