साईमत चाळीसगाव प्रतिनिधी
तालुक्यातील शिवापूर शिवारात भक्षाचा पाठलाग करताना एका विहिरीत पडलेल्या बिबट्याला वनविभागाने यशस्वी रेस्क्यू ऑपरेशन राबवून सुखरूप बाहेर काढले आहे. या घटनेमुळे परिसरात काही काळ भीतीचे वातावरण निर्माण झाले होते.
प्राथमिक माहितीनुसार, रात्रीच्या सुमारास भक्षाचा पाठलाग करत असताना हा बिबट्या थेट शेतातील विहिरीत कोसळला. विहिरीत पडल्यावर त्याने पाण्यातील पाईपला आधार घेत स्वतःचा जीव वाचवत बराच वेळ तरंगत राहिल्याची माहिती समोर आली आहे.
ही घटना उघडकीस आल्यानंतर शिवापूर परिसरात नागरिकांमध्ये भीतीचे वातावरण निर्माण झाले. जळगाव जिल्ह्यात काही भागात बिबट्यांचा वावर वाढत असल्याने शेतकरी आणि ग्रामस्थांमध्ये चिंता व्यक्त केली जात आहे.
घटनेची माहिती मिळताच स्थानिक शेतकऱ्यांनी तातडीने वनविभाग आणि पोलिसांना कळवले. त्यानंतर वनविभागाच्या पथकाने घटनास्थळी धाव घेत रेस्क्यू ऑपरेशन सुरू केले.
दोऱ्याला खाट बांधून ती विहिरीत सोडण्यात आली आणि अत्यंत काळजीपूर्वक बिबट्याला वर काढण्यात आले. काही तासांच्या प्रयत्नांनंतर बिबट्याला सुरक्षित बाहेर काढण्यात वनविभागाला यश आले.
बिबट्याला सुखरूप बाहेर काढल्यानंतर ग्रामस्थांनी सुटकेचा निःश्वास टाकला आहे. तसेच या यशस्वी बचाव मोहिमेबद्दल वनविभागाचे कौतुक करण्यात येत आहे.
