साईमत / दिल्ली
दिल्ली विमानतळावर मोठी धक्कादायक घटना घडली आहे. स्पाईसजेट आणि अकासा एअर या दोन विमानांच्या पंखांची टक्कर झाल्याने विमानसेवा काही काळासाठी थांबवण्यात आली आहे.
मिळालेल्या माहितीनुसार, अकासा एअरचे QP 1406 हे विमान दिल्लीहून हैदराबादला जाण्यासाठी सज्ज होते. त्याच वेळी दुसऱ्या विमानामुळे या विमानाच्या पंखाला धडक बसली. ही घटना टॅक्सींगदरम्यान घडल्याचे सांगण्यात आले आहे.
या घटनेनंतर तातडीने सर्व प्रवाशांना सुरक्षितपणे विमानातून बाहेर काढण्यात आले असून कोणतीही जीवितहानी किंवा जखमी झाल्याचे वृत्त नाही. विमानतळावरील उड्डाणे तात्पुरती थांबवण्यात आली आहेत.
अकासा एअरच्या प्रवक्त्याने दिलेल्या माहितीनुसार, सर्व प्रवासी आणि कर्मचारी सुरक्षित आहेत. त्यांना हैदराबादला पोहोचवण्यासाठी पर्यायी व्यवस्था करण्यात येत आहे.
दुसरीकडे, स्पाईसजेटच्या प्रवक्त्याने सांगितले की, टॅक्सींगदरम्यान त्यांच्या B737-700 विमानाच्या पंखांची दुसऱ्या विमानाशी टक्कर झाली. या घटनेत दुसऱ्या विमानाचे उजवे पंख आणि डावे हॉरिझॉन्टल स्टेबिलायझर नुकसानग्रस्त झाले आहे. स्पाईसजेटचे विमान सध्या दिल्ली विमानतळावर थांबवण्यात आले आहे.
या घटनेनंतर विमान सुरक्षिततेबाबत पुन्हा एकदा गंभीर प्रश्न उपस्थित झाले आहेत.
