मध्यरात्री घडलेल्या घटनेने प्रवाशांमध्ये भीतीचे वातावरण; महिला प्रवाशांना लक्ष्य करत दागिन्यांची चोरी
साईमत / सातारा
काही दिवसांपूर्वी साताऱ्यातील कराड येथे सह्याद्री एक्सप्रेसवर घडलेल्या दरोड्यासारखीच घटना पुन्हा एकदा समोर आली आहे. यावेळी परभणी जिल्ह्यातील मानवत रोड रेल्वे स्थानकाजवळ काकीनाडा साईनगर एक्सप्रेस (गाडी क्रमांक १७२०६) वर दरोडा पडल्याची धक्कादायक घटना घडली आहे.
बुधवारी मध्यरात्री ही गाडी परभणीच्या दिशेने येत असताना, अज्ञात चोरट्यांनी रेल्वे सिग्नल यंत्रणेत बिघाड केल्याने सिग्नलचा लाल दिवा लागला आणि ट्रेन थांबली. ही संधी साधत दरोडेखोरांनी थांबलेल्या ट्रेनमध्ये प्रवेश केला.
चोरट्यांनी जनरल आणि एस-४ डब्यात शिरून थेट प्रवाशांना लक्ष्य केले. विशेषतः महिला प्रवाशांकडील सोन्याचे दागिने आणि मौल्यवान वस्तू हिसकावून घेतल्या गेल्या. अचानक घडलेल्या या प्रकारामुळे प्रवाशांमध्ये मोठ्या प्रमाणावर भीतीचे वातावरण निर्माण झाले.
लूटमार केल्यानंतर दरोडेखोर अंधाराचा फायदा घेत घटनास्थळावरून पसार झाले. या घटनेमुळे रेल्वे प्रवासाच्या सुरक्षिततेवर पुन्हा एकदा गंभीर प्रश्नचिन्ह निर्माण झाले आहे.
