साईमत धुळे प्रतिनिधी
शहराजवळील एका गावात अत्यंत धक्कादायक आणि वेदनादायी घटना समोर आली असून गर्भपातासाठी घेतलेल्या गोळ्यांचे अतिसेवन झाल्याने १८ वर्षीय अविवाहित तरुणीचा मृत्यू झाला आहे. या घटनेमुळे संपूर्ण परिसरात एकच खळबळ उडाली आहे.
मिळालेल्या माहितीनुसार, संबंधित तरुणीची अचानक तब्येत बिघडल्याने तिला देवपूर येथील एका खासगी रुग्णालयात दाखल करण्यात आले होते. प्राथमिक तपासणीत डॉक्टरांना ती सुमारे २४ आठवड्यांची म्हणजेच सहा महिन्यांची गर्भवती असल्याचे निदर्शनास आले. गरोदरपणा लपवण्यासाठी किंवा गर्भपात करण्याच्या उद्देशाने तिने काही औषधांचे सेवन केल्याची शक्यता वर्तवली जात आहे.
औषधांचे अतिसेवन झाल्यामुळे तिचा रक्तदाब झपाट्याने कमी झाला आणि तिला झटके येऊ लागले. प्रकृती अधिक गंभीर झाल्याने डॉक्टरांनी तिला तातडीने धुळे येथील हिरे शासकीय रुग्णालयात हलवण्याचा सल्ला दिला. मात्र अतिदक्षता विभागात उपचार सुरू असतानाच तिची प्राणज्योत मालवली.
या घटनेची माहिती मिळताच मोहाडी पोलिसांनी तातडीने रुग्णालयात धाव घेतली. या प्रकरणी अकस्मात मृत्यूची नोंद करण्यात आली असून पुढील तपास सुरू आहे.
दरम्यान, इतक्या प्रगत अवस्थेतील गर्भपातासाठी औषधे कोणाकडून उपलब्ध झाली, ती तरुणीपर्यंत कशी पोहोचली आणि यामागे कोणते रॅकेट कार्यरत आहे का, याबाबत पोलिसांकडून सखोल तपास सुरू करण्यात आला आहे. ही घटना उघड झाल्यानंतर आरोग्य आणि औषध विक्री व्यवस्थेवरही गंभीर प्रश्न उपस्थित होत आहेत.
