महाराष्ट्राच्या राजकारणात पुन्हा ‘भूकंप’चे संकेत? भाजप मित्रपक्षांवरच डाव साधणार असल्याचा बड्या नेत्याचा खळबळजनक दावा

रोहित पवारांच्या विधानामुळे राजकीय वर्तुळात खळबळ; पुढील महिन्यात मोठ्या घडामोडींचे संकेत

साईमत मुंबई प्रतिनिधी

 महाराष्ट्राच्या राजकारणात गेल्या काही वर्षांपासून सातत्याने घडत असलेल्या उलथापालथींच्या पार्श्वभूमीवर पुन्हा एकदा मोठ्या राजकीय भूकंपाचे संकेत मिळत आहेत. भाजपचे सत्तेतील मित्रपक्षच आगामी काळात भाजपच्या निशाण्यावर येऊ शकतात, असा खळबळजनक दावा राष्ट्रवादी काँग्रेस (शरदचंद्र पवार गट)चे आमदार रोहित पवार यांनी केला आहे. त्यांच्या या विधानामुळे राज्यातील राजकीय वातावरण चांगलेच तापले आहे.

2019 पासून महाराष्ट्राच्या राजकारणात मोठ्या घडामोडी घडत आल्या आहेत. शिवसेनेतील फुटीनंतर एकनाथ शिंदे यांनी अनेक आमदारांसह भाजपसोबत सत्ता स्थापन केली होती. त्यानंतर राष्ट्रवादी काँग्रेसमध्येही फूट पडत अजित पवार गट सत्तेत सहभागी झाला. या सगळ्या घडामोडींमुळे राज्यातील राजकीय समीकरणे सातत्याने बदलत राहिली आहेत.

दरम्यान, काही दिवसांपूर्वी ठाकरे गटातील खासदार शिंदे गटात प्रवेश करणार असल्याच्या चर्चांनीही राजकीय वर्तुळात जोर धरला होता. अशातच आता रोहित पवार यांच्या नव्या विधानामुळे पुन्हा एकदा राजकीय वातावरण ढवळून निघाले आहे.

‘सत्तेतल्या मित्रपक्षांनाच लक्ष्य केले जाणार’ – रोहित पवारांचा दावा

सोशल मीडियावर केलेल्या पोस्टमध्ये रोहित पवार यांनी म्हटले आहे की, “भाजपचे सत्तेतले मित्रपक्ष विरोधी पक्षाचे आमदार-खासदार फोडतील अशा बातम्या दिसत आहेत. मात्र वस्तुस्थिती वेगळी असून पुढील महिन्याच्या अखेरपर्यंत सत्तेतल्या मोठ्या पक्षाकडून त्यांच्या मित्रपक्षांनाच लक्ष्य केले जाणार आहे, अशी ठोस माहिती आहे.”

यासोबतच त्यांनी भाजपवर थेट निशाणा साधत सध्याच्या राजकीय हालचालींवर तीव्र टीका केली आहे. “भोंदू खरात प्रकरण ठरवून आणले गेले असून ही फक्त सुरुवात आहे,” असा आरोपही त्यांनी केला आहे.

रोहित पवार यांनी पुढे म्हटले आहे की, सध्या जरी सत्ताधारी पक्षांमध्ये ‘ए दोस्ती हम नहीं छोड़ेंगे’ अशी भावना दिसत असली तरी भविष्यात मित्रपक्षांची भूमिका बदलून ‘जा बेवफा जा हमे…’ अशी परिस्थिती निर्माण होऊ शकते.

राजकीय वर्तुळात खळबळ

रोहित पवार यांच्या या विधानानंतर राज्याच्या राजकारणात नव्या चर्चांना उधाण आले आहे. भाजप आपल्या मित्रपक्षांवरच राजकीय डाव टाकणार का, कोणत्या पक्षावर त्याचा परिणाम होणार, याबाबत तर्कवितर्कांना उधाण आले आहे.

राजकीय निरीक्षकांच्या मते, हे विधान केवळ राजकीय आरोप-प्रत्यारोपांचा भाग असू शकतो, तर काहींच्या मते आगामी निवडणुकांच्या पार्श्वभूमीवर मोठ्या राजकीय हालचालींचे संकेतही यातून मिळू शकतात.

पुढील काळ निर्णायक

या सगळ्या घडामोडींमुळे महाराष्ट्रातील राजकीय वातावरण पुन्हा एकदा तापले असून, पुढील काही महिने अत्यंत निर्णायक ठरणार असल्याचे मानले जात आहे. रोहित पवार यांचा दावा खरा ठरतो का, हे पाहणे आता महत्त्वाचे ठरणार आहे.