नागरिकांचा वेळ व प्रवास वाचवण्यासाठी लोकशाही दिनात ऑनलाईन सुविधा सुरू
साईमत /जळगाव / प्रतिनिधी–
दर महिन्याच्या पहिल्या सोमवारी आयोजित होणारा जिल्हास्तरीय लोकशाही दिन यंदा ६ एप्रिल २०२६ रोजी सकाळी १०.३० वाजता जिल्हाधिकारी कार्यालयाच्या अल्पबचत सभागृहात पार पडणार आहे, अशी माहिती रहिवासी उपजिल्हाधिकारी वैशाली चव्हाण यांनी दिली. या दिवसाचे मुख्य उद्देश नागरिकांच्या वैयक्तिक हितसंबंधातील तक्रारींचा त्वरित विचार करणे आणि प्रशासनाकडून तत्काळ मार्गदर्शन मिळवून देणे आहे.
रहिवासी उपजिल्हाधिकाऱ्यांनी नागरिकांना आवाहन केले आहे की, त्यांनी जर यापूर्वी तालुका स्तरावर लोकशाही दिनात अर्ज केला असेल आणि एका महिन्याच्या आत उत्तर मिळाले नसेल, तर त्या अर्जासंबंधी तक्रारी घेऊन त्यांनी या लोकशाही दिनी उपस्थित रहावे. यामुळे नागरिकांना त्यांच्या समस्यांवर प्रत्यक्ष चर्चेसाठी एक व्यासपीठ उपलब्ध होईल.
जिल्हा प्रशासनाने नागरिकांचा वेळ, प्रवासाचा खर्च आणि श्रम वाचवण्यासाठी अर्ज नोंदणी प्रक्रिया अधिक सुलभ केली आहे. ६ एप्रिल २०२६ पासून पुढील सर्व लोकशाही दिनांसाठी नागरिकांना प्रत्यक्ष जिल्हाधिकारी कार्यालयात येण्याची आवश्यकता राहणार नाही.
त्याऐवजी, नागरिकांना आता जिल्हाधिकारी जळगाव यांच्या अधिकृत संकेतस्थळावर आपले अर्ज ऑनलाइन दाखल करण्याची सुविधा मिळणार आहे. तसेच, ऑनलाईन अर्ज प्राप्त झाल्यानंतर, जिल्हाधिकारी कार्यालयाद्वारे संबंधित विभागांना lokshahidinjalgaon@gmail.com या अधिकृत ई-मेलद्वारे पाठवले जातील, आणि विभागांनी केलेल्या कार्यवाहीचा अहवाल लोकशाही दिनी सादर करणे अनिवार्य आहे.
यामुळे नागरिकांच्या तक्रारींवर जलद आणि पारदर्शक मार्गाने उपाययोजना होऊ शकतील, तसेच प्रशासन आणि नागरिकांमधील संवाद अधिक प्रभावी आणि सुलभ होईल, असे जिल्हा प्रशासनाने सांगितले आहे.
