डॉक्टरच्या घरातून ३२ हजारांचा ऐवज लंपास
साईमत /जळगाव / प्रतिनिधी:
शहरातील बळीराम पेठ परिसरात बंद घरांना लक्ष्य करणाऱ्या चोरट्यांचा पुन्हा एकदा डाव यशस्वी ठरला असून, एका नामांकित डॉक्टरच्या घरावर डल्ला मारत सोन्याचे दागिने व रोकड असा एकूण ३२ हजार रुपयांचा मुद्देमाल चोरट्यांनी लांबविल्याची घटना उघडकीस आली आहे. या प्रकरणामुळे परिसरात भीतीचे वातावरण निर्माण झाले आहे.
मिळालेल्या माहितीनुसार, बळीराम पेठ येथील रहिवासी डॉ. अजिजुल्ला इस्माईल शेख (वय ६२) हे २६ मार्च रोजी दुपारी सुमारास आपल्या कुटुंबासह पुणे येथे मुलाला भेटण्यासाठी गेले होते. त्यांच्या अनुपस्थितीत घर बंद असल्याची संधी साधत अज्ञात चोरट्यांनी घरावर पाळत ठेवून चोरीची योजना आखली.
दरम्यान, चोरट्यांनी घराच्या मुख्य दरवाजाची कडी-कोंडा व कुलूप तोडून आत प्रवेश केला. घरात शिरल्यानंतर त्यांनी कपाटे उचकापाचक करत मौल्यवान वस्तूंचा शोध घेतला. ३१ मार्च रोजी डॉ. शेख कुटुंबासह परतल्यानंतर घराचे कुलूप तुटलेले दिसून आले. घरात प्रवेश करताच कपाटातील सामान अस्ताव्यस्त अवस्थेत पडलेले दिसले आणि सोन्याचे दागिने व रोकड गायब असल्याचे स्पष्ट झाले.
या चोरीत चोरट्यांनी सुमारे ३२ हजार रुपयांचा ऐवज लंपास केला आहे. याप्रकरणी जळगाव शहर पोलीस ठाण्यात अज्ञात चोरट्यांविरोधात गुन्हा दाखल करण्यात आला असून, पुढील तपास पोलीस करत आहेत.
दरम्यान, शहरात बंद घरांवर लक्ष ठेवून चोरीच्या घटना वाढत असल्याने नागरिकांनी सतर्क राहण्याची गरज व्यक्त होत आहे. पोलिसांनीही गस्त वाढवून अशा चोरट्यांचा बंदोबस्त करण्याची मागणी नागरिकांकडून होत आहे.
