जिल्हापेठ पोलीस ठाण्याच्या हद्दीत घटना; नागरिकांमध्ये भीतीचे वातावरण
साईमत जळगाव प्रतिनिधी:
जळगाव शहरात वाढत्या गुन्हेगारी घटनांमुळे नागरिकांमध्ये अस्वस्थता पसरली असताना, जिल्हापेठ पोलीस ठाण्याच्या हद्दीत पुन्हा एकदा घरफोडीची घटना उघडकीस आली आहे. बंद घरावर लक्ष ठेवून अज्ञात चोरट्यांनी तब्बल ५० हजार रुपयांची रोकड लंपास केल्याने परिसरात खळबळ उडाली आहे.
शहरातील यश हाइट्स समोरील राजयोग गुरुदत्त नगर भागात ही घटना घडली. अमोल गंगाधरराव भेंडे (वय ३८) हे खाजगी नोकरी करतात. २६ मार्च रोजी रात्री ८ वाजेपासून ते ३० मार्चच्या पहाटे ४.३० वाजेपर्यंत त्यांचे घर बंद होते. याच संधीचा फायदा घेत चोरट्याने घराचे कुलूप तोडून आत प्रवेश केला.
घरात ठेवलेली सुमारे ५० हजार रुपयांची रोकड चोरट्याने चोरून नेली. ३० मार्च रोजी सकाळी घरफोडी झाल्याचे लक्षात येताच परिसरात एकच खळबळ उडाली. वाढत्या घरफोड्यांच्या घटनांमुळे नागरिकांमध्ये भीतीचे वातावरण अधिकच गडद झाले आहे.
या प्रकरणी अमोल भेंडे यांनी दिलेल्या तक्रारीवरून जिल्हापेठ पोलीस ठाण्यात अज्ञात चोरट्याविरोधात गुन्हा दाखल करण्यात आला आहे. पुढील तपास पोलीस कर्मचारी रवींद्र ठाकरे करत असून, चोरट्यांचा शोध घेण्यासाठी पोलीसांनी प्रयत्न सुरू केले आहेत.
दरम्यान, शहरात सलग घडणाऱ्या चोरीच्या घटनांमुळे पोलीसांनी गस्त वाढवावी आणि अशा गुन्ह्यांवर आळा घालावा, अशी मागणी नागरिकांकडून होत आहे.
