साईमत / अहिल्यानगर
राज्यात अपघातांची मालिका सुरू असतानाच, अहिल्यानगर- जामखेड-कर्जत रोडवर शनिवारी एक भीषण अपघात घडला. नववी व दहावीत शिकणाऱ्या मित्रांची चारचाकी उलटली असून यात ७ विद्यार्थी गंभीर जखमी झाले आहेत. त्यातील एकाची प्रकृती चिंताजनक असल्याची माहिती मिळाली आहे.
अहिल्यानगरमधील विद्यार्थ्यांनी जामखेडकडे जाऊन अकलूज वॉटर पार्कला भेट देण्याचा निर्णय घेतला होता. वाहन चालवणाऱ्या चालकाचा ताबा सुटल्याने कार एका ठिकाणी उलटली आणि त्यानंतर एक ते दोन वेळा फिरली. अपघातातील सर्व विद्यार्थी हे नववी आणि दहावीतील मित्र असल्याचे समजते.
अपघातानंतर स्थानिक ग्रामस्थांनी तातडीने हस्तक्षेप करून सर्व विद्यार्थ्यांना कारमधून बाहेर काढले. जखमी विद्यार्थ्यांवर तातडीने जामखेड रुग्णालयात उपचार सुरू झाले आहेत. विद्यार्थ्यांचे कुटुंबीय देखील घटनास्थळी पोहोचले आहेत.
अपघातामुळे कारचा प्रचंड चेंदामेंदा झाला असून वाहन पूर्णपणे उद्ध्वस्त झाले आहे. विद्यार्थ्यांच्या सुरक्षिततेसाठी स्थानिक प्रशासन आणि रुग्णालयातील वैद्यकीय टीम सतत उपचारावर लक्ष ठेवत आहेत.
