साईमत / धरणगाव / प्रतिनिधी
धरणगाव तालुक्यातील बांभोरी-टाकरखेडा फाटा जवळ एक धक्कादायक घटना समोर आली आहे. जुन्या वादातून एका तरुणावर जीवघेणा हल्ला करण्यात आला असून, याप्रकरणी गुरूवारी, १९ मार्च रोजी मध्यरात्री १ वाजता धरणगाव पोलीस ठाण्यात गुन्हा नोंदवण्यात आला आहे.
संदर्भानुसार, स्वप्निल दत्तात्रय निकम (वय ३८, रा. वाटिका आश्रम जवळ) हे १८ मार्च रोजी संध्याकाळी ६ वाजेच्या सुमारास आपल्या दुचाकीवरून बांभोरी फाट्याकडे जात होते. या वेळी संशयित आरोपी अमोल लांडगे (रा. शिव कॉलनी) यांनी जुन्या भांडणाची कुरापत काढून स्वतंत्र फोरव्हीलर गाडीने दुचाकीला जोरदार धडक दिली.
अपघातानंतर स्वप्निल यांनी “तू धडक का दिली?” असे विचारले असता, आरोपी अमोल लांडगे यांनी गाडीतून उतरून अश्लील शिवीगाळ करून स्टीलचा रॉड डोक्यात टाकून गंभीर दुखापत केली.
स्वप्निल निकम यांनी दिलेल्या फिर्यादीवरून आरोपीविरुद्ध गुन्हा दाखल करण्यात आला असून, पुढील तपास पोहेकॉ प्रविण तांदळे करत आहेत.
या घटनेमुळे स्थानिक लोकांमध्ये धोक्याची जाणीव वाढली असून, पोलिसांनी या प्रकारात कठोर कारवाई करण्याचे आश्वासन दिले आहे.
