क्रूझर जीप ट्रकला भिडली, टायर फुटल्याने नियंत्रण सुटलं
साईमत / पुणे / प्रतिनिधी
पुणे-सोलापूर राष्ट्रीय महामार्गावरील इंदापूर तालुक्यातील लोणी देवकर परिसरात मंगळवारी सकाळी भीषण अपघात झाला. पोलिसांच्या माहितीनुसार, क्रूझर जीपचा टायर फुटल्यामुळे नियंत्रण सुटून जीप दुभाजक ओलांडत समोरून येणाऱ्या ट्रकवर आदळली. या अपघातात क्रूझरमधील तिघांचा जागीच मृत्यू झाला.
मृतांमध्ये चालक प्रमोद बाळासो खवळे (वय 28, रा. मदनवाडी), शशांक कोटिया (वय 32, रा. गौतमनगर, ग्वालियर) आणि विजयसिंह राजपूत (वय 35, रा. त्रिलोकनगर, मध्यप्रदेश) यांचा समावेश आहे. प्राथमिक माहिती नुसार, तिघेही लोणी देवकर एमआयडीसीतील एका खासगी कंपनीत काम करत होते.
पोलिसांनी सांगितले की, MH 14 LB 1613 क्रमांकाची जीप पुण्याकडून सोलापूरकडे जात असताना टायर फुटल्यामुळे जीप नियंत्रणाबाहेर झाली. धडक इतकी जबरदस्त होती की जीपचा समोरील भाग चुराडा झाला. घटनास्थळी इंदापूर महामार्ग पोलीस तातडीने पोहोचले आणि वाहतूक सुरळीत केली.
कोकण-कोल्हापूर जोडणाऱ्या करूळ घाटात इथेनॉल टँकर पलटी; चालक जखमी
कोकणात कारूळ घाटात इथेनॉलने भरलेला टँकर पलटी झाला. सुदैवाने यामध्ये कोणतीही जीवितहानी झाली नाही. केबिनमध्ये अडकलेल्या चालकाला वैभववाडी पोलिसांच्या मदतीने क्रेनच्या साहाय्याने बाहेर काढले गेले. त्याच्या पायाला व हाताला गंभीर दुखापत झाली असून, वैभववाडी ग्रामीण रुग्णालयात उपचार सुरु आहेत. MH 09 FL 7165 क्रमांकाचा टँकर चालक नकाप्पा डोईफोडे वारणा येथून गोव्याला जात होता. गगनबावडापासून काही अंतरावर चालकाचा ताबा सुटल्यामुळे टँकर डोंगराकडील गटारात पलटी झाला. टँकरचा दर्शनी भाग चक्काचूर झाला.
