७ कामगार जखमी, दोघांची प्रकृती गंभीर
साईमत/ जळगाव / प्रतिनिधी
जिल्ह्यातील धरणगाव तालुक्यातील पाळधी येथे साईबाबा मंदिर परिसरात सुरू असलेल्या पर्यटन विकास कामादरम्यान आज मोठी दुर्घटना घडली. बांधकाम सुरू असताना अचानक तयार होत असलेला स्लॅब कोसळल्याने सात कामगार जखमी झाले असून त्यापैकी दोन कामगारांची प्रकृती गंभीर असल्याची माहिती मिळाली आहे.
मिळालेल्या माहितीनुसार, मंदिर परिसराचा विकास पर्यटन प्रकल्पांतर्गत कोट्यवधी रुपयांच्या निधीतून करण्यात येत आहे. गेल्या वर्षभरापासून येथे विविध बांधकामांची कामे सुरू आहेत. मात्र आज बांधकाम सुरू असतानाच अचानक स्लॅब कोसळल्याने कामगारांमध्ये घबराट पसरली.
या दुर्घटनेत जखमी झालेल्या सात कामगारांना तातडीने जवळच्या रुग्णालयात उपचारासाठी दाखल करण्यात आले आहे. त्यापैकी दोन जणांची प्रकृती गंभीर असल्याने त्यांच्यावर विशेष उपचार सुरू असल्याचे समजते.
दरम्यान, या घटनेमुळे बांधकाम ठिकाणी कामगारांच्या सुरक्षेचा मुद्दा पुन्हा ऐरणीवर आला आहे. कामगारांना आवश्यक सुरक्षा साधने जसे हेल्मेट, सेफ्टी शूज आणि इतर संरक्षण साहित्य देण्यात आले होते का, तसेच त्यांचा विमा काढण्यात आला होता का, याची चौकशी होण्याची शक्यता व्यक्त केली जात आहे.
दुर्घटना नेमकी कशामुळे घडली आणि बांधकामात काही निष्काळजीपणा झाला का, याचा तपास प्रशासनाकडून सुरू करण्यात येणार आहे. घटनेनंतर काही काळ परिसरात तणावाचे वातावरण निर्माण झाले होते.
