आरोपीने धमकी दिली, “तू मला नाही म्हटली, तर तुझे व्हिडिओ व्हायरल करीन.”
साईमत/जळगाव / प्रतिनिधी–
शहरात एका १८ वर्षीय तरुणीवरील असह्य आणि धक्कादायक गुन्ह्याची माहिती समोर आली आहे. पीडितेचे खासगी अश्लील व्हिडिओ सोशल मीडियावर व्हायरल होण्याची धमकी देऊन तिचा विनयभंग केल्याचा प्रकार उघडकीस आला असून, पोलिसांनी आरोपीला अटक केली आहे.
मिळालेल्या माहितीनुसार, जळगाव शहरात राहणारी पीडित तरुणी आणि १९ वर्षीय हुजेफा युनुस पिंजारी (रा. चाळीसगाव रोड, धुळे) यांची ओळख होती. १९ नोव्हेंबर २०२४ ते फेब्रुवारी २०२६ या कालावधीत आरोपीने पीडितेचे काही खासगी व्हिडिओ मोबाईलमध्ये मिळवले. नंतर त्याने ही व्हिडिओ सोशल मीडियावर व्हायरल करण्याची धमकी देऊन पीडितेवर दबाव टाकला.
तक्रारीत म्हटले आहे की, बाथरूममधील पीडितेचे अश्लील व्हिडिओ शूट केले गेले. आरोपीने वारंवार धमकी दिली, “तू मला नाही म्हटली, तर तुझे व्हिडिओ व्हायरल करीन.” यासोबतच, आरोपीने पीडितेवर तिचे फोटो पाठवण्याची जबरदस्तीही केली. या सततच्या मानसिक त्रासामुळे तरुणी प्रचंड दडपणाखाली होती.
अखेर पीडितेने धैर्य दाखवून जिल्हापेठ पोलीस ठाण्याचे रस्ता गाठला आणि आपली आपबिती सांगितली. पोलिसांनी घटनेचे गांभीर्य लक्षात घेऊन हुजेफा पिंजारी याच्याविरुद्ध गुन्हा दाखल केला आणि आरोपीला अटक केली. पुढील तपास पोलीस उपनिरीक्षक शांताराम देशमुख करीत आहेत.
या घटनेने शहरातील युवक-युवतींमध्ये सुरक्षिततेबाबत चिंता वाढली असून, पोलिसांनी अशा प्रकारच्या प्रकरणांवर कडक कारवाई करण्याचे आश्वासन दिले आहे.
