दोन दिवसांत जळगाव हॉटेल्सची सेवा ठप्प होण्याची शक्यता
साईमत/ जळगाव/ प्रतिनिधी
जळगावमधील हॉटेल उद्योग आता गॅस तुटवड्यामुळे कठीण परिस्थितीशी सामना करीत आहे. आंतरराष्ट्रीय पातळीवरील अमेरिका-इराण संघर्षामुळे व्यावसायिक गॅस पुरवठा साखळीवर गंभीर परिणाम झाला असून, शहरात सध्या गॅसचा अभूतपूर्व तुटवडा निर्माण झाला आहे. शहरातील प्रमुख वितरकांकडे सध्या मर्यादित साठा उपलब्ध असून, परिस्थिती अशीच राहिली तर येत्या दोन दिवसांत अनेक हॉटेल्सची शेगडी विझण्याची शक्यता आहे.
जळगाव जिल्ह्यात सुमारे २५०० हून अधिक हॉटेल्स पूर्णपणे व्यावसायिक गॅसवर अवलंबून आहेत. पुरवठा खंडित झाल्यामुळे हॉटेल मालकांना तातडीने उपाययोजना करावी लागत आहेत. काही हॉटेल्समध्ये जास्त गॅस लागणारे पदार्थ बनवणे तात्पुरते थांबवले गेले असून, मेनूमध्ये कपात करावी लागली आहे. तसेच, चहा वारंवार उकळवण्याऐवजी एकदाच मोठ्या प्रमाणात तयार करून थर्मासमध्ये साठवण्यासारख्या तडजोडी कराव्या लागत आहेत.
या संकटाचा परिणाम केवळ हॉटेल मालकांपुरता मर्यादित नसून, त्यावर अवलंबून असलेले हजारो कामगार, भाजीपाला विक्रेते, दूध व्यावसायिक आणि किराणा पुरवठादार यांची साखळी देखील विस्कळीत होण्याची भीती आहे. काही व्यावसायिक इतर शहरांतून चढ्या दराने गॅस सिलिंडर मिळवण्याचा प्रयत्न करत आहेत, मात्र त्यामुळे उत्पादन खर्चात मोठी वाढ होत आहे.
जळगावमधील हॉटेल व्यावसायिकांनी सरकारकडे तातडीने लक्ष देऊन गॅस पुरवठा सुरळीत करण्याची मागणी केली आहे. अन्यथा, येत्या दोन दिवसांत स्थानिक अर्थव्यवस्थेवर आणि ग्राहकांवर या तुटवड्याचे गंभीर परिणाम जाणवणार आहेत.
या संकटामुळे जळगावच्या हॉटेल उद्योगाला आणि त्यावर अवलंबून असलेल्या साखळीला आता मोठा आव्हान उभा राहिला आहे, आणि त्वरित उपाययोजना न केल्यास येत्या दिवसात शहरातील ग्राहकांना सेवेत गंभीर अडचणींना सामोरे जावे लागू शकते.
