जळगाव महापालिकेत महायुतीची गटनेतृत्व स्थापन, विकासकामांना नवा वेग
साईमत/ जळगाव /प्रतिनिधी
जळगाव महानगरपालिकेत महायुतीच्या सत्तास्थापनेनंतर प्रशासकीय प्रक्रियेचा महत्त्वाचा टप्पा पार पडला असून नाशिक विभागीय आयुक्त कार्यालयात महायुतीच्या गटनेतृत्वाची अधिकृत नोंद झाली आहे. या नोंदीमुळे महापालिकेतील सत्ताकारणाला औपचारिक स्वरूप प्राप्त झाले असून आगामी कार्यकाळासाठी नेतृत्वाची दिशा स्पष्ट झाली आहे.
महायुतीकडून प्रकाश बलानी यांची गटनेतेपदी निवड करण्यात आली असून त्यांच्या नेतृत्वाखाली सत्ताधारी गट महापालिकेतील कामकाज पुढे नेणार आहे. उपगटनेतेपदी नितीन बरडे यांची नियुक्ती झाली असून पक्षांतर्गत समन्वय, सभागृहातील भूमिका व निर्णय प्रक्रियेत त्यांची महत्त्वाची भूमिका राहणार आहे. तसेच, प्रतोदपदी डॉ. चंद्रशेखर पाटील यांची नियुक्ती करण्यात आली असून सभागृहातील शिस्त, नियोजन आणि धोरणात्मक रणनीती आखण्याची जबाबदारी त्यांच्याकडे सोपवण्यात आली आहे.
नाशिक विभागीय आयुक्तांकडे गटनेत्यांची अधिकृत नोंद झाल्याने महापालिकेतील प्रशासकीय व राजकीय प्रक्रियांना वेग मिळणार आहे. सत्तास्थापनेनंतर विकासकामे, धोरणात्मक निर्णय, अर्थसंकल्पीय नियोजन तसेच नागरी प्रश्नांवर एकसंघपणे निर्णय घेण्यासाठी ही नियुक्ती महत्त्वाची मानली जात आहे.
महायुतीच्या नेतृत्वावर शहरातील पायाभूत सुविधा, स्वच्छता, पाणीपुरवठा व वाहतूक व्यवस्थेचे प्रश्न मार्गी लावण्याची मोठी जबाबदारी आहे. शहराच्या विकासाला प्राधान्य देत सर्व घटकांना विश्वासात घेऊन कामकाज करण्याचा निर्धार नवनियुक्त पदाधिकाऱ्यांनी व्यक्त केला आहे.
महापालिकेतील सत्ताधारी गटाची अधिकृत रचना स्पष्ट झाल्याने विरोधकांची भूमिका व सभागृहातील आगामी घडामोडींवरही राजकीय वर्तुळाचे लक्ष केंद्रीत झाले आहे. एकूणच, महायुतीची सत्ता स्थिरावल्याने जळगाव महापालिकेतील कारभाराला औपचारिक सुरुवात झाली असून शहराच्या विकासाच्या अपेक्षा पुन्हा एकदा केंद्रस्थानी आल्या आहेत.
