अप्सरा चौकात मोटारसायकल पार्किंगवरून तणाव; व्यापारी–ठेलेवाले पोलिस ठाण्यात
साईमत /भुसावळ/प्रतिनिधी ::
शहरातील गजबजलेल्या अप्सरा चौक परिसरात आज सकाळी मोटारसायकल पार्किंगवरून सुरू झालेला किरकोळ वाद काही वेळात तणावात रूपांतरित झाला. या घटनेमुळे थेट छबीलदास कपडा मार्केटमध्ये व्यवहार ठप्प झाले आणि परिसरात चिंता पसरली.
अप्सरा चौकात सुमारे ११ वाजता, दुकानासमोर मोटारसायकल उभी ठेवण्याच्या कारणावरून एका लोडगाडी चालक आणि दुकानदारामध्ये शाब्दिक चकमक झाली. सुरुवातीला साधा वाद वाटला असला तरी, काही वेळातच परिस्थिती नियंत्रणाबाहेर गेली आणि परिसरात गोंधळाचे वातावरण निर्माण झाले.
वादाची माहिती मिळताच आसपासच्या व्यापाऱ्यांमध्ये भीतीचे वातावरण पसरले. संभाव्य अनुचित प्रकार टाळण्यासाठी छबीलदास कपडा मार्केटमधील व्यापाऱ्यांनी आपली दुकाने तात्पुरती बंद ठेवण्याचा निर्णय घेतला. अचानक दुकाने बंद झाल्यामुळे बाजारात आलेल्या ग्राहकांची मोठी गैरसोय झाली आणि काही काळ बाजार ओस पडल्याचे चित्र समोर आले.
घटनेनंतर व्यापारी आणि ठेलेवाले मोठ्या संख्येने पोलीस ठाण्यात दाखल झाले. दोन्ही गटांनी एकमेकांविरोधात तक्रारी नोंदवल्या असून गुन्हा नोंदविण्याची प्रक्रिया सुरू आहे. परिस्थिती अधिक चिघळू नये यासाठी पोलिसांनी तत्काळ हस्तक्षेप करून अप्सरा चौक व आसपासच्या भागात अतिरिक्त बंदोबस्त तैनात केला.
अप्सरा चौक हा शहरातील अत्यंत गजबजलेला भाग असल्यामुळे या घटनेचा परिणाम वाहतुकीवरही झाला; काही काळ वाहनांची कोंडी निर्माण झाली होती. पोलिसांनी दोन्ही बाजूंना समजावून शांतता राखण्याचे आवाहन केले. सध्या परिस्थिती नियंत्रणात असून संपूर्ण घटनेचा पुढील तपास बाजारपेठ पोलिसांकडून सुरू आहे.
