सुप्रीम कॉलनीतील घटना, एमआयडीसी पोलीस ठाण्यात गुन्हा दाखल
साईमत /जळगाव/प्रतिनिधी
जळगाव शहरातील सुप्रीम कॉलनी परिसरात किरकोळ कारणावरून रिक्षाचालकाला लाकडी धोपट्याने मारहाण करून गंभीर दुखापत केल्याची धक्कादायक घटना शनिवारी (३ जानेवारी) दुपारी सुमारे २ वाजता घडली. या प्रकरणी रविवारी (४ जानेवारी) दुपारी १२ वाजता एमआयडीसी पोलीस ठाण्यात गुन्हा दाखल करण्यात आला आहे.
याबाबत मिळालेल्या माहितीनुसार, सचिन राजू राठोड (वय ३२, रा. रायपूर फाटा, कुसुंबा, ता. जळगाव) हा आपल्या कुटुंबासह वास्तव्यास असून रिक्षा चालवून उदरनिर्वाह करतो. नेहमीप्रमाणे शनिवारी दुपारी तो सुप्रीम कॉलनी परिसरात रिक्षासह उभा असताना मोहित जयसिंग बागडे (रा. सिंधी कॉलनी, जळगाव) याने त्याच्याशी किरकोळ कारणावरून वाद घातला. वादाचे रूपांतर शिवीगाळ व धक्काबुक्कीमध्ये झाले आणि पुढे मोहित बागडे याने लाकडी धोपट्याने सचिन राठोड याच्यावर मारहाण केल्याचा आरोप आहे. या हल्ल्यात राठोड यांना गंभीर दुखापत झाली.
घटनेनंतर सचिन राठोड यांनी एमआयडीसी पोलीस ठाण्यात तक्रार दाखल केली. त्यांच्या तक्रारीवरून संबंधित आरोपीविरुद्ध गुन्हा नोंदविण्यात आला आहे. या प्रकरणाचा पुढील तपास पोलीस नाईक पंकज पाटील करीत आहेत.
दरम्यान, शहरात किरकोळ कारणांवरून होणाऱ्या वादांना हिंसक वळण लागण्याच्या घटना वाढत असल्याने नागरिकांमध्ये चिंतेचे वातावरण आहे. सार्वजनिक ठिकाणी शांतता व सुव्यवस्था राखण्यासाठी पोलिसांनी कडक पावले उचलावीत, अशी मागणी स्थानिकांकडून व्यक्त होत आहे.
