डॉ. बेंडाळे महाविद्यालयात आयोजित विद्यापीठस्तरीय समुपदेशन कार्यशाळेत प्रतिपादन
साईमत/जळगाव/जळगाव :
आधुनिकीकरणामुळे आज आपण जागतिक झालो असलो तरी कौटुंबिक पातळीवर एकाकी होत आहोत. मोबाईलभोवती आपले जीवन प्रदक्षिणा घालू लागले आहे. त्यामुळे तरुण-तरुणी भावनिकदृष्ट्या संस्कारमुक्त बनत आहेत. अशा परिस्थितीत समुपदेशन अत्यंत गरजेचे आहे. त्यामुळेच जीवनातील गुंतागुंतीचे प्रश्न ‘समुपदेशनाने’ सुटतात, असे प्रतिपादन अधिष्ठाता आंतरविद्याशाखीय विद्याशाखा-सदस्य, विद्या परिषद जळगाव कबचौउमविचे प्रा. डॉ. साहेबराव भुकन यांनी केले. जळगाव विद्यापीठ, आजीवन अध्ययन-विस्तार सेवा विभाग (पीएम-उषा) आणि डॉ. अण्णासाहेब जी. डी. बेंडाळे महिला महाविद्यालय (स्वायत्त) यांच्या संयुक्त विद्यमाने विद्यापीठस्तरीय एकदिवसीय मुला-मुलींसाठी समुपदेशन कार्यशाळा नुकतीच पार पडली. त्यावेळी ते बोलत होते.
कार्यशाळेचे उद्घाटन अधिष्ठाता प्रा. डॉ. भुकन यांच्या हस्ते करण्यात आले. अध्यक्षस्थानी प्राचार्य डॉ. व्ही. जे. पाटील होते. प्रमुख पाहुणे म्हणून उच्च शिक्षणाचे सहसंचालक डॉ. पराग मसराम उपस्थित होते. कला, वाणिज्य शाखेचे उपप्राचार्य डॉ. सत्यजित साळवे लिखित ‘महाविद्यालय गीत’ संगीत विभागाच्या प्रा. ऐश्वर्या परदेशी यांच्या नेतृत्वाखाली विद्यार्थिनींनी सादर केले.
उद्घाटनानंतरच्या पहिल्या सत्रात मानसशास्त्रज्ञ डॉ. वीणा महाजन यांनी ‘विवाहपूर्व समुपदेशन’ विषयावर मार्गदर्शन करत विवाह, कुटुंबव्यवस्था, जोडीदारांतील नाते व वैवाहिक जीवनातील सहजीवनाची सूत्रे स्पष्ट केली. दुसऱ्या सत्रात स्त्रीरोगतज्ज्ञ डॉ. सोनल इंगळे यांनी ‘आरोग्यशास्त्र व पौगंडावस्था’ विषयावर किशोरवयातील मानसिक-शारीरिक बदल व समस्यांवर चर्चा केली. दुपारच्या सत्रात नंदुरबारमधील जी.टी.पी. महाविद्यालयाचे डॉ. सतीश सुर्ये यांनी ‘व्यवसाय समुपदेशन’ विषयावर करिअरविषयक मार्गदर्शन केले. चौथ्या सत्रात नंदुरबारचे प्रा. डॉ. एस.यू. अहिरे यांनी ‘मानसिक आरोग्य समुपदेशन’ विषयावर मार्गदर्शन करुन विद्यार्थ्यांच्या प्रश्नांना समर्पक उत्तरे देऊन समाधान केले.
सहभागी २०० विद्यार्थ्यांना प्रमाणपत्रांचे वितरण
समारोपप्रसंगी प्रा. डॉ. कीर्ती कमलजा यांनी कार्यशाळेचे महत्त्व अधोरेखित केले. ही कार्यशाळा तरुणांना योग्य दिशा देणारी आहे. त्यांच्या उज्ज्वल भविष्यासाठी फलदायी ठरेल, असे मत प्राचार्य डॉ. व्ही. जे. पाटील यांनी अध्यक्षीय भाषणात व्यक्त केले. दिवसभर चाललेल्या कार्यशाळेचा आढावा समन्वयक डॉ. अशोक पाटील यांनी सादर केला. कार्यशाळेत श्रुती मराठे व सुवर्णा राणे ह्या विद्यार्थिनींनी प्रातिनिधिक मनोगत व्यक्त करत समाधान व्यक्त केले. शेवटी सहभागी २०० विद्यार्थ्यांना मान्यवरांच्या हस्ते प्रमाणपत्रांचे वितरण करण्यात आले.
यांनी घेतले परिश्रम
व्यासपीठावर डॉ. पी.एन. तायडे, डॉ. सत्यजित साळवे, प्रा. डॉ. स्मिता चौधरी, अजय शिवरामे आदी उपस्थित होते. यशस्वीतेसाठी डॉ. राणी त्रिपाठी, डॉ. विनोद नन्नवरे, डॉ. दीपक किनगे, डॉ. सचिन कुंभार, प्रा. योगिता सोनवणे, प्रा. निलेश कोळी, प्रा. शांताराम तायडे, प्रा. प्रियंका आठे, प्रा. मंगेश किनगे, प्रा. करण थोरात, प्रा. अमृता नेतकर, प्रा. कल्पना खेडकर तसेच शिक्षकेतर सहकाऱ्यांचे सहकार्य लाभले. प्रास्ताविक समन्वयक डॉ. अशोक पाटील, सूत्रसंचालन प्रा. दीपक पवार, प्रा. सुनील अहिरे, प्रा. नयना पाटील यांनी केले.
