साईमत प्रतिनिधी
जळगाव जिल्ह्यातील जामनेर तालुक्यात सलग दोन दिवस झालेल्या मुसळधार पावसाने मोठा हाहाकार माजवला आहे. नेरी, चिंचखेडा यांसह परिसरातील अनेक गावांमध्ये पाण्याचा पूर ओसंडून वाहत असल्याने शेतजमिनी तसेच घरांचे मोठ्या प्रमाणावर नुकसान झाले आहे. शेतीसह जनजीवन ठप्प झाले असून, ग्रामस्थांना असहाय्यतेची वेळ आली आहे.
शेतकऱ्यांचे पिके पाण्याखाली, माती वाहून गेली
पुरामुळे शेतकऱ्यांचे कापूस, सोयाबीन, मका, भुईमूग यांसारखी हंगामी पिके पूर्णपणे पाण्याखाली गेली आहेत. काही ठिकाणी वाहून गेलेल्या गाळामुळे शेतीची सुपीकता नष्ट झाली आहे. शेतकऱ्यांचे आर्थिक गणित कोलमडले असून, या हंगामात अपेक्षित उत्पादन मिळण्याची शक्यता अत्यंत कमी असल्याचे शेतकरी बांधव व्यक्त करत आहेत.
घरांमध्ये पाणी शिरल्याने ग्रामस्थांचे हाल
पूरग्रस्त भागातील अनेक घरांमध्ये पाणी घुसल्याने ग्रामस्थांना सुरक्षित ठिकाणी हलवण्यात आले. पिण्याचे पाणी, अन्नधान्य, वीजपुरवठा आणि वाहतुकीच्या समस्या निर्माण झाल्या आहेत. नागरिकांना तातडीने मदतीची गरज भासत आहे.
प्रशासनाची पाहणी मोहीम
आज जिल्हाधिकारी आयुष प्रसाद, सा.बां. विभागाचे अधीक्षक अभियंता प्रशांत सोनवणे, तहसिलदार नानासाहेब आगळे, जिल्हाध्यक्ष चंद्रकांत बाविस्कर यांच्यासह स्थानिक पदाधिकारी आणि ग्रामस्थांच्या उपस्थितीत नेरी व चिंचखेडा गावांचा दौरा करण्यात आला. यावेळी पूरग्रस्त शेती व घरांची प्रत्यक्ष पाहणी करून शेतकऱ्यांचे दुःख ऐकण्यात आले.
तात्काळ पंचनाम्याचे आदेश
जिल्हाधिकाऱ्यांनी या आपत्तीचा गांभीर्याने आढावा घेत तात्काळ पंचनामे करण्याचे आदेश दिले. तसेच शेतकऱ्यांना दिलासा देण्यासाठी मदत यंत्रणा गतीमान करण्याचे निर्देशही अधिकाऱ्यांना देण्यात आले. ग्रामस्थांना तातडीची मदत पोहोचवली जाईल, असे आश्वासन प्रशासनाने दिले आहे.
निसर्गाच्या संकटात सरकार शेतकऱ्यांच्या पाठीशी
या अस्मानी संकटात बळीराजाला शासन एकटे सोडणार नाही, असे स्पष्ट करत राज्य सरकार शेतकऱ्यांच्या पाठीशी खंबीरपणे उभे असल्याचा दिलासा देण्यात आला. नुकसानभरपाईबाबत लवकरच ठोस निर्णय घेतला जाईल, अशी खात्री संबंधित अधिकाऱ्यांनी दिली.
