जैन हिल्सवरील ‘पारंपरिक सण’ डोळ्यांचे पारणे फेडणारा ठरला
साईमत/जळगाव/प्रतिनिधी :
आदिवासी पारंपरिक नृत्य…विश्व गर्जना युवा सदस्यांचे ढोल-ताशांच्या वादनासह सादरीकरण, पारंपरिक संबळ वाद्यावर कंपनीच्या विविध ठिकाणी कामावर असलेल्या सालदारांचे नृत्य…कृषी संस्कृती ते मोलाचे स्थान असलेल्या वृषभ राजाची निघालेली भव्य मिरवणूक…जैन हिल्सवरील ‘पारंपरिक पोळा सण’… डोळ्यांचे पारणे फेडणारा ठरला. अशोक जैन यांच्यासह शहरातील मान्यवरांसह अनुभूती स्कूल, गांधी रिसर्च फाउंडेशनच्या विद्यार्थ्यांनी ठेका धरत आनंदोत्सव उत्साहात साजरा केला.
जैन इरिगेशनचे संस्थापक-अध्यक्ष भवरलाल जैन यांनी २९ वर्षांपासून पारंपरिक पद्धतीने हा सण साजरा करण्याची पद्धत सुरू केली होती. यावेळी नव्या पिढीला भारतीय कृषी संस्कृती अनुभवता यावी, त्याचे महत्त्व समजावे अशा मुख्य हेतुने शाळा, महाविद्यालयाच्या विद्यार्थ्यांसह शहरातील मान्यवरांना हा उत्सव अनुभवण्यासाठी आवर्जून आमंत्रित केले जाते.
जैन हिल्स येथील ध्यानमंदीर येथे कृषी संशोधन प्रात्याक्षिक केंद्राच्या शेती विभागाच्या विविध ठिकाणाच्या सालदार मंडळींनी बैलांना एकत्र करून त्यांना पोळ्यासाठी तयार केले. तेथूनच सवाद्य मिरवणूक निघाली. कंपनीचे संस्थापक तथा मोठे भाऊ भवरलाल जैन यांचे स्मृतिस्थळ ‘श्रद्धा ज्योत’ येथे भाऊंच्या स्मृतिंना अभिवादन केले. मारुतीच्या मंदिराचे दर्शन घेऊन सरस्वती पॉईंट, गुरुकुल पार्किंग मार्गे निघालेली सवाद्य मिरवणूक जैन हिल्स हेलीपॅडच्या मैदानात पोहोचली. यावेळी अशोक जैन यांच्या हस्ते धवल ध्वज फडकावून बैल पोळाची सुरवात झाली.
जैन इरिगेशन सिस्टिम्स् लिमिटेडच्या कृषी संशोधन व विकास कार्यक्रमांतर्गत जैन हिल्सच्या कृषी विभागातर्फे आयोजित पोळा उत्सवाप्रसंगी प्रथमत: अशोक जैन, ज्योती जैन, निशा जैन, शोभना जैन, डॉ. भावना जैन यांच्यासह जैन परिवाराच्या हस्ते वृषभराजाचे पूजन करण्यात आले. याप्रसंगी जिल्हा पोलीस अधीक्षक डॉ. महेश्वर रेड्डी, ऐश्वर्या रेड्डी, जेडीसीसी बँकेचे चेअरमन संजय पवार, व्यवस्थापकीय संचालक जितेंद्र देशमुख, डॉ. शेखर रायसोनी, अग्रणी बँकेचे सुनील दोहरे, महाराष्ट्र राज्य क्रेडाईचे उपाध्यक्ष अनिश शहा, आर्किटेक्ट शिरीष बर्वे, स्वरुप लुंकड, पारस राका, गोटूशेठ बंब, नंदलाल गादीया, माजी नगरसेवक अमर जैन, डॉ. उल्हास पाटील फिजोथेरेपीचे प्राचार्य डॉ. जयवंत नागुलकर, नॅचरोपॅथीच्या डॉ. कल्याणी नागूलकर, गांधी रिसर्च फाउंडेशनच्या डीन प्रो. गीता धरमपाल, अनुभूती स्कूलचे विद्यार्थी, गांधी रिसर्च फाउंडेशनचे डिप्लोमाचे विद्यार्थी, पंचक्रोशीतील शेतकरी, शहरातील विविध क्षेत्रातील मान्यवरांसह नागरिकांची उपस्थिती होती.
‘हंसराज’ने यंदाही सलग चौथ्यांदा मिळविला पोळा फोडण्याचा मान
पोळा सण अजून द्विगुणीत व्हावा, यासाठी कंपनीचे सह व्यवस्थापकीय संचालक अतुल जैन यांच्या संकल्पनेने यंदाचा पोळा फोडण्याच्या रोख पारितोषिकात वाढ केली होती. त्यानुसार यावर्षी २० हजार रुपयांचे रोख पारितोषिके मान्यवरांच्या हस्ते वितरीत केले. त्यात जैन वाडा येथील सालदार हंसराज थावरस जाधव, अविनाश गोपाळ यांना पहिला मान मिळाला. ‘हंसराज’ने यावर्षी सलग चौथ्यांदा पोळा फोडण्याचा मान मिळविला आहे. त्यांना प्रत्येकी (रोख ५ हजार रुपये) तर जैन सोसायटीचे दिलीप पावरा, साजन पावरा यांना दुसरा मान मिळाला (प्रत्येकी २ हजार रुपये) तर उर्वरित सहा जणांना तिसऱ्या क्रमांकाचा मान मिळाला. त्यात गोविंद पावरा, भगवान सावळे, वाल्मिक शिंदे, किशोर शिंदे, रामसिंग पवार यांना गौरविण्यात आले.
सालदारगडींचा भेटवस्तू देऊन सपत्नीक गौरव
जैन इरिगेशनच्या कृषी विभागाचे काम विविध साईटवर चालते. वर्षभर शेतात राबणाऱ्यांचा सन्मान करण्याची प्रथा अविरत सुरू ठेवली आहे. त्यात कंपनीच्या जैन हिल्स बॉटम, गोशाळा, जैन वाडा, जैन व्हॅली व्ह्यू, ५०० एकर, जैन रेसिडेन्सी ६० एकर, जैन डिव्हाईन पार्क, भाऊंची सृष्टी, जैन सोसायटी शिरसोली आदींचा समावेश आहे. ३१ सालदार गडी आणि ३२ हून अधिक बैलजोडी काळ्या मातीत राबत असते. अशा सर्व सालदारगडींचा भेटवस्तू देऊन सपत्नीक मान्यवरांच्याहस्ते गौरव करण्यात आला. अशोक जैन, ज्योती जैन, जैन इरिगेशनचे वरिष्ठ शास्त्रज्ज्ञ डॉ. अनिल ढाके, डॉ. बी. के. यादव, संजय सोनजे, सेवानिवृत्त वन अधिकारी राजेंद्र राणे, डॉ. इंगळे, विजयसिंग पाटील, डॉ. कल्याणी मोहरीर, प्रो. गीता धरमपाल आदी मान्यवरांच्याहस्ते गौरव झाला. सूत्रसंचालन किशोर कुळकर्णी यांनी केले.
पारंपरिक आदिवासी नृत्य अन् चित्तथरारक प्रात्यक्षिके सादर
यावल तालुक्यातील निंबादेवी धरणाजवळील रोशनबर्डी येथील वालू सोनासिंग बारेला यांच्या कलापथकाने पारंपरिक आदिवासी नृत्य आणि चित्तथरारक प्रात्यक्षिके सादर केले. विशेष म्हणजे या कलापथकाच्या मालकीची २० एकर जमीन आहे. त्यांनी गेल्यावर्षी जैन इरिगेशनने विकसित केलेल्या जैन स्वीट ऑरेंजची लागवड केली आहे. पथकाने आपल्या कलेच्या सादरीकरणासाठी कुठलेही मानधन न घेता पर्यावरण संवर्धनासाठी प्रत्येकी एक फळझाड द्यावे, अशी विनंती केली होती. त्यानुसार कंपनीचे अध्यक्ष अशोक जैन यांच्याहस्ते पथकाच्या सदस्यांनी रोपे स्वीकारली.
मान्यवरांनी वाद्याच्या तालावर धरला ठेका…!
जळगावातील विश्व गर्जना युवा सदस्यांच्या ढोल पथकातील १०० वादकांनी तालबद्ध वादन करुन उपस्थितांची मने जिंकली. गांधी रिसर्च फाउंडेशनच्या डिप्लोमाच्या विद्यार्थ्यांनी आदिवासी नृत्य सादर केले. अनुभूती इंग्लिश मिडीअम स्कूलच्या विद्यार्थ्यांनीही जल्लोष केला. शिरसोली येथील बॅन्ड बथकाच्या वाद्यावर ॲग्री टास्क फोर्स, सालदार मंडळी आणि सहकाऱ्यांनीही संबळावर नृत्याविष्कार सादर केला. विशेष महत्त्वाचे म्हणजे जैन इरिगेशनचे अध्यक्ष अशोक जैन, अतुल जैन यांच्यासह उपस्थित मान्यवरांनी वाद्याच्या तालावर ठेका धरून आनंद व्यक्त केला.
