जुने जळगाव परिसरात पसरली शोककळा
साईमत/जळगाव/प्रतिनिधी :
शहरातील जुने जळगाव परिसरातील रामपेठ भागात एका तरुणाने राहत्या घरी वरच्या मजल्यावर जाऊन गळफास घेऊन ‘आयुष्य’ संपविल्याची घटना घडली आहे. याप्रकरणी शनिपेठ पोलीस स्टेशनला अकस्मात मृत्यूची नोंद केली आहे. दरम्यान, या घटनेमुळे जुने जळगाव परिसरात शोककळा पसरली आहे. मयत तरुणाचे जयेश मुरलीधर खडके (वय २७) असे नाव आहे.
शहरातील जुने जळगाव परिसरातील रामपेठ भागात जयेश हा आई, वडील, मोठा भाऊ यांच्यासह वास्तव्यास होता. तो एमसीएचे शिक्षण घेऊन आता रोजगाराच्या शोधात असल्याची माहिती नातेवाईकांनी दिली. काही दिवसांपासून तो जॉबच्या शोधात होता. मंगळवारी, १९ ऑगस्ट रोजी रात्री ११ ते १२ वाजेच्या सुमारास जयेशच्या घरातील सदस्य खालील खोलीत होते. जयेश हा वरच्या मजल्यावरील खोलीत गेला होता. काही वेळाने कुटुंबीय वरच्या खोलीत गेले असता जयेशने गळफास लावून आत्महत्या करुन आयुष्य संपविल्याचे त्यांना दिसले. यावेळी घाबरलेल्या परिवाराने जयेशला शासकीय वैद्यकीय महाविद्यालय व रुग्णालयात दाखल केले होते. तेथील वैद्यकीय अधिकाऱ्यांनी तपासून त्याला मयत घोषित केले. यावेळी परिवाराने एकच आक्रोश केला होता.
