केंद्रीय राज्यमंत्री रक्षा खडसेंनी केली प्रस्तावित जागेची पाहणी
साईमत/जळगाव/प्रतिनिधी :
यावल तालुक्यातील हिंगोणा बु. येथे केळी टिशू कल्चर रोपे उत्पादन केंद्र उभारणीसाठी प्रस्तावित जागेची केंद्रीय क्रीडा व युवक कल्याण राज्यमंत्री श्रीमती रक्षा निखिल खडसे यांनी रविवारी, १७ ऑगस्ट रोजी पाहणी केली. भारतीय बीज सहकारी समिती लिमिटेडमार्फत अत्याधुनिक केंद्र उभारण्यात येणार आहे. महाराष्ट्रातील केळी उत्पादक शेतकऱ्यांसाठी केंद्र म्हणजे आशेचा किरण ठरणार आहे. अशा केंद्रामुळे शेतकऱ्यांना रोगमुक्त, उच्च उत्पादनक्षम आणि परवडणाऱ्या दरातील टिशू कल्चर रोपे वेळेत उपलब्ध होणार असून उत्पादनात वाढ होईल.
हिंगोणा हे ठिकाण केंद्रासाठी आदर्श निवडले गेले आहे. खोल काळी सुपीक माती, पुरेशी पाण्याची उपलब्धता तसेच केळी पट्ट्याच्या मध्यभागी असलेला भौगोलिक लाभ यामुळे याठिकाणी केंद्र उभारण्याचा निर्णय घेण्यात आला आहे. योजनेसाठी प्रधानमंत्री नरेंद्र मोदी, केंद्रीय सहकारिता मंत्री अमित शहा, मुख्यमंत्री देवेंद्र फडणवीस यांचे विशेष सहकार्य लाभले आहे. याबद्दल श्रीमती रक्षाताई खडसे यांनी त्यांचे आभार मानले. केंद्राच्या उभारणीमुळे जळगाव जिल्हा आणि महाराष्ट्रातील शेतकरी ‘बनाना कॅपिटल’ म्हणून आपली ओळख अधिक बळकट करतील, असा विश्वास श्रीमती खडसे यांनी व्यक्त केला.
