भडगाव तालुक्यातील गुढे गावात पसरली शोककळा; कर्तृत्व अन् शौर्य भावी पिढ्यांसाठी प्रेरणादायी ठरेल
साईमत/जळगाव/प्रतिनिधी :
५७ वाहिनी सीमा सुरक्षा दलातील कॉन्स्टेबल (जी.डी.) स्वप्निल सुभाष सोनवणे यांचा कर्तव्य बजावत असताना विजेच्या धक्क्याने झालेल्या मृत्यूनंतर मंगळवारी, १२ ऑगस्ट रोजी सकाळी त्यांच्या भडगाव तालुक्यातील मूळ गावी गुढे येथे सैनिकी सन्मानाने अंत्यसंस्कार करण्यात आले. “वीर जवान अमर रहे” च्या घोषणा देण्यात आल्या. गावातील नागरिक, नातेवाईक, मान्यवर व माजी सैनिकांनी अश्रूंच्या धारा वाहत आपल्या वीर पुत्राला अखेरचा निरोप दिला. गेल्या ९ ऑगस्ट रोजी सायंकाळी बीओपी ढोलागुरी येथे सीमा फ्लड लाईट खांब दुरुस्त करताना विजेचा धक्का बसून जवान सोनवणे गंभीर जखमी झाले होते. तातडीने त्यांना बाळुरघाट जिल्हा रुग्णालयात नेण्यात आले, मात्र उपचार सुरू होण्यापूर्वीच त्यांनी अखेरचा श्वास घेतला. जवान सोनवणे यांच्या निधनाने परिसरात शोककळा पसरली आहे. त्यांचे कर्तृत्व व शौर्य पुढील पिढ्यांसाठी प्रेरणादायी ठरेल.
त्यांच्या पार्थिवावर पूर्ण सैनिकी सन्मानाने मंगळवारी, १२ ऑगस्ट रोजी सकाळी १० वाजता अंतिम विधी पार पडले. यावेळी तहसीलदार शितल सोलाट, पोलीस उपनिरीक्षक सुधीर सोनवणे, जिल्हा सैनिक कल्याण अधिकारी संजय गायकवाड, ५७ बटालियन बीएसएफचे इन्स्पेक्टर कमल किशोर व सलामी पथक, माजी आमदार दिलीप वाघ, वैशाली सूर्यवंशी, सुमित पाटील, माजी सभापती विकास पाटील, शेतकी संघाचे चेअरमन भैय्यासाहेब पाटील, माजी जि.प. सदस्य संजय पाटील, शिवसेना तालुकाप्रमुख समाधान पाटील, युवा नेते हर्षल पाटील, शिवदास पाटील, माझ्या सैनिक फेडरेशन भडगावचे अध्यक्ष प्रमोद पाटील, उपाध्यक्ष, सचिव तथा माजी सैनिक बापू पाटील, गुढेच्या सरपंच कल्पना महाजन, पोलीस पाटील मिलिंद मोरे यांच्यासह अनेक मान्यवर उपस्थित होते.
