लोकमान्य टिळक, अण्णाभाऊ साठेंच्या योगदानावर वक्त्यांनी टाकला प्रकाश
साईमत/जळगाव/प्रतिनिधी :
शहरातील राष्ट्रीय महामार्गावरील जलाराम बाप्पा मंदिरालगतच्या चेतना व्यसनमुक्ती केंद्रात समाजसेवक अण्णाभाऊ साठे यांची जयंती तसेच ज्येष्ठ विचारवंत लोकमान्य बाळ गंगाधर टिळक यांची पुण्यतिथी साजरी करुन दोघा महापुरुषांना अभिवादन करण्यात आले. सुरुवातीला मान्यवरांच्या हस्ते अण्णाभाऊ साठे आणि लोकमान्य टिळक यांच्या प्रतिमांचे पूजन करून त्यांच्या कार्याचे स्मरण करुन दोघा महापुरुषांच्या आठवणींना उजाळा दिला. यावेळी ज्ञान वेद अबॅकसचे संचालक संदीप सोनार, ज्येष्ठ समाजसेवक अशोक भावसार, दूरदर्शन तथा टीव्ही कलावंत नितीन तायडे, चेतना व्यसनमुक्ती केंद्राचे संचालक डॉ. नितीन विसपुते यांच्यासह सहकाऱ्यांची उपस्थिती लाभली.
उपस्थित मान्यवरांनी मनोगतातून अण्णाभाऊ साठे यांच्या साहित्यिक, सामाजिक कार्यावर तर लोकमान्य टिळकांच्या स्वातंत्र्य लढ्यातील महान योगदानावर प्रकाश टाकला. स्वातंत्र्य सैनिक, विचारवंत व समाजसुधारक म्हणून टिळकांचे कार्य आजच्या पिढीस मार्गदर्शक असल्याचे वक्त्यांनी नमूद केले. अण्णाभाऊ साठे यांनी आपल्या साहित्य आणि कार्यातून समाजातील वंचितांना नवा आत्मविश्वास दिला. त्यांचा संघर्ष आजही प्रेरणादायी असल्याचे विचार व्यक्त केले.
व्यसनमुक्तीबाबत समाजात जनजागृती करण्याची गरज
शेवटी सर्व मान्यवरांनी व्यसनमुक्तीबाबत समाजात जनजागृती करण्याची आणि महान व्यक्तिमत्त्वांच्या कार्यातून प्रेरणा घेण्याची गरज अधोरेखित केली. याप्रसंगी उपस्थित नागरिकांनी मान्यवरांचे विचार मनःपूर्वक ऐकून प्रेरणा घेतली. त्यामुळे हा कार्यक्रम संस्मरणीय ठरला. सूत्रसंचालन तथा आभार चेतना व्यसनमुक्ती केंद्रातील सहकाऱ्यांनी मानून सर्वांनी परिश्रम घेतले.
