केंद्रीय राज्यमंत्री रक्षा खडसे यांची रेल्वे बोर्डाच्या चेअरमनांकडे मागणी
साईमत/जळगाव/प्रतिनिधी :
केंद्रीय राज्यमंत्री रक्षा खडसे यांनी रेल्वे बोर्डाचे चेअरमन सतीश कुमार यांची नुकतीच भेट घेऊन भुसावळ रेल्वे विभागातील रावेर स्थानकावर काही महत्त्वाच्या गाड्यांचे थांबे देण्याची मागणी केली आहे. बैठकीत रावेर आणि वरणगाव स्थानकांवर स्थानिक नागरिकांच्या वाढत्या मागणीनुसार गाड्यांचे थांबे देण्याबाबत सविस्तर चर्चा झाली. श्रीमती खडसे यांनी प्रवाशांच्या सोयीसाठी काही महत्त्वाच्या रेल्वे गाड्यांचे थांबे तात्काळ मंजूर करण्याची विनंती केली.
त्यात नवजीवन एक्स्प्रेस (गाडी क्र. १२६५६)–बोदवड थांबा, दानापूर-पुणे एक्सप्रेस (गाडी क्र. १२१५०)–रावेर थांबा (पुणे मार्ग), महानगरी एक्सप्रेस (गाडी क्र. २२१७७)–रावेर थांबा ह्या गाड्यांचा समावेश आहे. रावेर येथे गाड्यांचे थांबे देण्यात आल्यास शालेय व महाविद्यालयीन विद्यार्थी, शेतकरी, व्यापारी, नोकरदार, कामगार वर्ग तसेच सामान्य प्रवाशांना मोठा दिलासा मिळेल. त्यामुळे संपूर्ण परिसराचा सामाजिक व आर्थिक विकास साधला जाईल, असा विश्वास श्रीमती खडसे यांनी व्यक्त केला.
मागण्यांकडे सकारात्मकपणे लक्ष देणार
रेल्वे बोर्डाचे चेअरमन सतीश कुमार यांनी त्यांच्या मागण्यांकडे सकारात्मकपणे लक्ष देण्याचे आश्वासन दिले आहे. लवकरच त्यावर निर्णय घेण्यात येईल, अशी अपेक्षा व्यक्त केली आहे. बैठकीला रेल्वे विभागाचे वरिष्ठ अधिकारीही उपस्थित होते.
