उपशिक्षक डॉ.नरेंद्र महाले लिखित पथनाट्यातून केले समाज प्रबोधन
साईमत/यावल/प्रतिनिधी
जिल्हाधिकारी आयुष प्रसाद यांच्या संकल्पनेतून तसेच जिल्हा स्वीप नोडल अधिकारी अकलाडे तसेच जिल्हा सहाय्यक स्वीप नोडल अधिकारी शिक्षणाधिकारी प्राथमिक विकास पाटील व माध्यमिकच्या कल्पना चव्हाण यांच्या मार्गदर्शक सूचनेनुसार संपूर्ण जिल्ह्यात मतदान जनजागृतीपर कार्यक्रम सुरू आहे. त्यानुसार यावल आणि रावेर विधानसभा मतदारसंघांत यावल तालुक्यातील यावल शहरात यावल पंचायत समिती, यावल महसूल विभाग व शिक्षण विभागाच्यावतीने मतदान जनजागृती करण्यासाठी “मतदार राजा जागा हो, लोकशाहीचा धागा हो” पथनाट्याचे अत्यंत अभ्यासपूर्ण व मनोरंजक पद्धतीने प्रबोधनात्मक सादरीकरण केले.
याप्रसंगी यावलच्या तहसीलदार मोहनमाला नाझीरकर, यावल पंचायत समितीच्या बीडीओ डॉ.मंजुश्री गायकवाड, गटशिक्षणाधिकारी विश्वनाथ धनके, केंद्रप्रमुख शाकीर, कविता गोहिल, मुख्याध्यापक जी.डी.कुलकर्णी, ए.एम.गर्गे, जी.एन.खान, यावल तालुक्यातील शिक्षक, शिक्षकेतर कर्मचारी तसेच विद्यार्थी यांची उपस्थिती होती.
यावल बस स्थानकात सरस्वती विद्यामंदिर यावलचे उपशिक्षक डॉ.नरेंद्र महाले लिखित ‘मतदार राजा जागा हो लोकशाहीचा धागा हो’ पथनाट्याचे मतदान जनजागृतीपर सादरीकरण करण्यात आले. त्यामध्ये मतदारांना मतदार नोंदणीपासून ते मतदानाच्या प्रक्रियेच्या संदर्भात मार्गदर्शन करून मतदानाची टक्केवारी जास्तीत जास्त मतदान करून वाढवावी, यासाठी प्रबोधन करण्यात आले. पथनाट्यात सरस्वती विद्यामंदिर व कनिष्ठ महाविद्यालयाचे विद्यार्थी संचित कोळी महाराज, यश वारके, विनायक बारी, उपशिक्षक डॉ.नरेंद्र महाले यांनी विविध भूमिका साकारत पथनाट्याचे सादरीकरण केले. पथनाट्यासाठी यावल बस आगाराचे प्रमुख दिलीप महाजन यांचे सहकार्य लाभले.
मतदान जनजागृतीसाठी नागरिकांना आवाहन
मतदान जनजागृतीसाठी बीडीओ डॉ.मंजुश्री गायकवाड यांनीही नागरिकांना आवाहन केले. याप्रसंगी यावल तालुक्यातील सर्व प्रसार माध्यमांच्या पत्रकार बांधवांनी हजेरी लावून मतदान जनजागृती प्रबोधनात सहकार्य केले. यशस्वीतेसाठी सरस्वती विद्यामंदिर, यावल, डॉ.झाकीर हुसेन हायस्कूल यावल, इंदिरा गांधी गर्ल्स हायस्कूल यावल, बाल संस्कार विद्या मंदिर, यावल या शाळांचे सहकार्य लाभले. प्रास्ताविक गटशिक्षणाधिकारी विश्वनाथ धनके तर आभार डॉ.नरेंद्र महाले यांनी मानले.
