तालुक्यात प्रत्येक तलाठ्यांचे यूजर आयडी तयार
साईमत/यावल/प्रतिनिधी
नैसर्गिक आपत्तीग्रस्त शेतकऱ्यांना आता ‘ई-पंचनामा ॲप’ माध्यमातून जलद गतीने पारदर्शक, वस्तुनिष्ठ भरपाई मिळणार असल्याची माहिती यावलच्या तहसीलदार मोहनमाला नाझिरकर यांनी दिली. MRSAC आणि महाराष्ट्र राज्याच्या मदत व पुनर्वसन विभागाच्या संयुक्त विद्यमाने राज्यातील विविध नैसर्गिक आपत्तीत शेतपिक, जमिन, जनावर, घर, गोठांचे झालेले नुकसानीचे जलद, पारदर्शक आणि वस्तुनिष्ठ भरपाई मिळण्यासाठी शेतकऱ्यांसाठी खास शासनाने ई-पंचनामा अत्यंत उपयोगी ‘ॲप’ विकसित केले.
यासंदर्भात नाशिक विभागात ५ सप्टेंबर २०२४ रोजी विभागीय कार्यालय, नाशिक याठिकाणी नाशिक विभागातील महसूल, ग्रामविकास, कृषी विभागातील अधिकाऱ्यांना प्रशिक्षण देण्यात आले. त्यानंतर जळगाव येथे गेल्या २० सप्टेंबर २०२४ रोजी जिल्हाधिकारी कार्यालयात जिल्हास्तरीय प्रशिक्षण कार्यक्रम घेण्यात आला. त्याअनुषंगाने यावल तहसील कार्यालयात सर्व तलाठी, मंडळ अधिकारी, नैसर्गिक आपत्ती क्लर्क यांना प्रशिक्षण देण्यात आले.
दसऱ्याच्या शुभ मुहूर्तावर तहसीलदार मोहनमाला नाझीरकर यांनी जिल्ह्यात सर्वप्रथम ‘ई-पंचनामा’ पोर्टलवर तालुक्याचे युजर आयडी क्रिएट केला आहे. त्यात तालुक्यातील सर्व कार्यरत तलाठी यांचे युजर आयडी तयार करून घेतले आहे. यापुढे तालुक्यात नैसर्गिक आपत्तीच्या नुकसानीचे पंचनामे ‘ई-पंचनामा’ ॲपवरच होणार असल्याची माहिती तहसीलदार यांनी दिली.
