पोलीस स्टेशनला अकस्मात मृत्यूची नोंद
साईमत/पाचोरा/प्रतिनिधी :
शहरातील पोलीस स्टेशनजवळील एका ५२ वर्षीय झेरॉक्स व्यावसायिकाने त्याच्याच दुकानात गळफास लावून आत्महत्या केल्याची घटना रविवारी, ८ सप्टेंबर रोजी सकाळी ८:३० वाजेच्या सुमारास घडली आहे. झेरॉक्स व्यावसायिकाने आत्महत्या का केली? त्याचा उलगडा अद्याप झालेला नाही. याप्रकरणी पाचोरा पोलीस स्टेशनमध्ये अकस्मात मृत्यूची नोंद केली आहे.
सविस्तर असे की, पाचोरा पोलीस स्टेशनच्या हाकेच्या अंतरावर परभतसिंग केसरसिंग राजपूत (वय ५२, रा. पांडव नगरी, पाचोरा) यांचे ‘गणेश झेरॉक्स’ नावाने दुकान आहे. झेरॉक्स व तहसील, प्रांत कार्यालयास लागणारे अर्ज विक्री करुन आपला व परिवाराचा उदरनिर्वाह चालवित होते. रविवार सुट्टीचा दिवस असल्याने परभतसिंग राजपूत हे सकाळी ८ वाजता घरुन निघाले होते. ते दुकानाकडे फेरफटका मारण्यासाठी परभतसिंग राजपूत दुकानात गेले होते. काहीच वेळात ते दुकानात नायलॉन दोरीने गळफास घेतलेल्या अवस्थेत आढळून आले. त्यांना तात्काळ जवळील ग्रामीण रुग्णालयात दाखल केल्यावर वैद्यकीय अधिकाऱ्यांंनी राजपूत यांना मृत घोषित केले. काही क्षणातच होत्याचे नव्हते झाले. मयत परभतसिंग राजपूत यांच्या पश्चात आई, वडील, पत्नी, दोन मुले असा परिवार आहे. पुढील तपास पाचोरा पोलीस करीत आहे.