सैय्यद कुटुंबियांचा ऐतिहासिक निर्णय
साईमत/मुक्ताईनगर/प्रतिनिधी :
येथील सिड फार्ममधील रहिवासी सैय्यद रौशन सैय्यद रौनक यांनी त्यांचा मुलगा सैय्यद जाहीदसाठी मुलगी पाहत असताना त्यांना बऱ्हाणपूर येथील राहणारे तथा हल्ली मुक्ताईनगर येथील रहिवासी शेख सईद शेख जब्बार यांची मुलगी अरबीना ही त्यांच्या मुलाला आवडली. दोघां कुटुंबानी एकमेकांना समजुन घेतल्यानंतर गुरुवारी, २९ ऑगस्ट रोजी साखरपुडा (मंगणी) करण्याचे ठरले होते. परंतु मुलीचे आजोबा व आजी यांनी मुक्ताईनगर मन्यार बिरादरीचे पंच कलीम मनियार जिल्हा उपाध्यक्ष हकिम आर.चौधरी यांच्याशी चर्चा केली. साखरपुडाऐवजी लग्न (निकाह) करा, असे त्यांनी सांगितले.
मनियार बिरादरीचे उपाध्यक्ष हकिम चौधरी, मनियार मस्जिद ट्रस्टचे कलीम मनियार, अहमद ठेकेदार यांनी दोन्ही नातेवाईकांशी लग्नाबाबत सविस्तर चर्चा केली.मनियार बिरादरीच्या पंच मंडळीनी दोघांना ईस्लामाचे अंतीम प्रेषित हजरत मोहम्मद पैगंबर यांच्या जीवनाबद्दल सांगितले. लग्न कशा पध्दतीने करावे, याविषयी सविस्तर माहिती दिली. त्यानंतर दोघां कुटुंबांनी निर्णय घेतला की, हेच साखरपुडा हेच लग्न करण्यास तयार झाले. ना जेवण… ना दहेज… ना अहेर… ना भेट वस्तु…तसेच मनियार मस्जिदचे मौलाना मुबशीर अहमद यांनी असरची नमाज केल्यानंतर मन्यार मस्जिदमध्ये निकाह अत्यंत साध्या पध्दतीने फक्त “खजुर” वर (निकाहची सुन्नत अदा करण्यात आली) लग्न लावण्यात आले. नवरा सैय्यद जाहीद आणि नवरी अरबीना विवाह बंधनात अडकले.
विवाह सोहळ्यात नवरदेवकडचे २५ आणि नवरीकडील २० मंडळी (पाहुणे) उपस्थित होते. तसेच फक्त खजुर देऊन लग्न लावण्यात आले. ह्यावेळी नवरदेवकडून पंच म्हणून शेख मुश्ताक शेख अमीर (रा.रावेर) आणि शेख मुश्ताक शेख हुसैन (रा.मलकापूर), सैय्यद साबीर सैय्यद करीम, शेख जहीर शेख खलील (पाळधी) उपस्थित होते.
लग्नात (निकाह) नवरीचे आजोबा शेख युसुफ शेख हसन, शेख अय्युब शेख.हसन तसेच नवरदेवकडून वकील म्हणून शेख अस्लम शेख कादर (रा.भुसावळ) उपस्थित होते. नवरदेवाचे आजोबा सैय्यद रौनक, शेख हारुन शेख हसन, नवरदेवाचे काका सैय्यद मुन्ना, सैय्यद जमील, नवरीचे मामा शेख वसीम शेख युसुफ, शेख इमरान शेख युसुफ, शेख इरफान शेख युसुफ, शेख मोहसीन शेख युसुफ, शेख गुफरान शेख युसुफ उपस्थित होते. शेवटी मनियार बिरादरीचे हकिम चौधरी (जिल्हा उपाध्यक्ष, मनियार बिरादरी), कलीम हाजी रसुल मनियार (मुतवल्ली मनियार मस्जिद ट्रस्ट, मुक्ताईनगर), खजिनदार अहमद शेख यासिन मनियार, अकील मनियार यांनी तसेच जळगाव जिल्हा मुस्लिम मनियार बिरादरीचे जिल्हाध्यक्ष फारुख शेख यांनीही नवरदेवासह नवरीच्या वडिलांना शुभेच्छा दिल्या.
