साईमत, मुक्ताईनगर : प्रतिनिधी
शहरात न.प. हद्दीत डॉ.गिरीश पाटील यांच्या घरापासून ते बोदवड रोडपर्यंत लाखो रुपयांचे गटारीचे काम हे अंदाजपत्रकाला तिलांजली देऊन सुरू आहे. पर्यवेक्षक अधिकाऱ्यांकडून आर्थिक हितसंबंधापोटी संबंधित ठेकेदाराच्या मनमानी कारभाराला अर्थपूर्ण पाठिंबा असल्याची चर्चा शहरात असल्याचा आरोप बहुजन मुक्ती पार्टीचे राज्य संघटक प्रमोद सौंदळे यांनी पत्रकार परिषदेद्वारे केला आहे.
अंदाजपत्रकानुसार गटारीचे खोदकाम केल्यानंतर पिचिंग केल्यानंतरच त्यावर स्टील टाकून काँक्रिटीकरण करणे बंधनकारक होते. परंतु संबंधित ठेकेदाराने अंदाजपत्रकाला केराची टोपली दाखवत डायरेक्ट काड्या मातीवरच काँक्रीट टाकलेले आहे. त्यामुळे भविष्यात नैसर्गिक तत्त्वानुसार काळी माती दबून निकृष्ट काँक्रीटमध्ये तळे जाऊन काँक्रीटमधून पाणी जमिनीत पाझरून संपूर्ण गटारीचा सत्यानाश झाल्याशिवाय राहणार नाही. परंतु या निकृष्ट कामाबद्दल न.प. प्रशासनाने अंदाजपत्रकात सोलिंग पिचिंग दिलेले नसल्याचे त्रयस्थ व्यक्तीमार्फत सांगण्यात येत आले. त्यामुळे नगरपंचायतच्या नफा फंडातून शहराच्या विकासासाठी दिलेल्या निधीतून संबंधित पर्यवेक्षक अधिकारी व ठेकेदार यांचाच विकास होत आहे की काय? असा प्रश्न परिसरातील नागरिक विचारात आहे.
नगरपंचायत प्रशासनाच्या आर्थिक पाठिंब्यामुळे ठेकेदार एवढ्यावरच थांबलेला नाही निकृष्ट कामांमध्ये वापरण्यात येणारे स्टील ही अंदाजपत्रकानुसार नाही. त्यांची करण्यात येणारी बांधी ही लांब लांब अंतरावर घेतलेली आहे. तसेच सुरू असलेल्या काँक्रीटच्या कामावर एवढ्या उष्ण तापमानात आजतागायत एकदाही पाणी मारण्यात आलेले नाही. यावरून एकंदरीतच मुक्ताईनगर नगरपंचायतच्या नफा फंडातून काढण्यात येणारी गटारी जनतेच्या सोयीसाठी नसून पर्यवेक्षक अधिकारी व ठेकेदारासाठी असल्याचे एकंदरीत सिद्ध होत असल्याचा आरोप बहुजन मुक्ती पार्टीचे राज्य संघटक प्रमोद सौंदळे यांनी पत्रकार परिषदेद्वारे केला आहे.
