साईमत, जामनेर : प्रतिनिधी
तालुक्यातील नेरी येथील आयुष्यमान आरोग्य मंदिरातर्फे गुरुवारी, २५ एप्रिल रोजी हिवताप दिन मोहीम राबविण्यात आली. ‘गाव तिथे हिवताप दिन’ संकल्पना राबवून कार्यक्रमाचे नियोजन केले होते. यासाठी जिल्हा आरोग्य अधिकारी डॉ.सचिन बाहेकर, जिल्हा हिवताप आरोग्य अधिकारी डॉ.तुषार देशमुख यांच्या आदेशानुसार आणि तालुका वैद्यकीय अधिकारी डॉ.राजेश सोनवणे, आयुष्यमान आरोग्य मंदिराचे वैद्यकीय अधिकारी डॉ.नरेश पाटील, डॉ.कोमल देसले यांच्या मार्गदर्शनानुसार तसेच तालुका हिवताप सुपरवायझर प्रवीण दाभाडे यांच्या उपस्थितीत नेरी येथे जनता माध्यमिक विद्यालय व ज्युनिअर कॉलेज येथील विद्यार्थ्यांना हिवताप दिनाबद्दल मार्गदर्शन करण्यात आले.
प्रत्येकाने दक्षता घेतल्यास डासांची उत्पत्ती होणार नाही, डास चावणार नाही, म्हणजे योग्य काळजी व वेळीच केलेला उपचार होणाऱ्या आजारापासून दूर ठेवेल. त्यासाठी किटकजन्य आजारावर नियंत्रण ठेवण्यासाठी सर्वांनी हातभार लावावा, असे आवाहन करण्यात आले. मोहीम यशस्वीतेसाठी विद्यालयाचे मुख्याध्यापक रवींद्र पाटील, बी.आर.पाटील, श्री.जाधव, श्री.सुरवाडे, श्री.पाटील, दीपाली पाटील यांच्यासह शिक्षक कर्मचाऱ्यांनी परिश्रम घेतले. यासाठी लॅब टेक्निशन अंबिका बोरुडे, आरोग्य सहाय्यक, दिनकर माळी, सोपान राठोड, आरोग्य सेवक रवींद्र सूर्यवंशी, गणेश पाटील, संदीप सावकारे, जितेंद्र नाईक, दिलीप शिंदे यांच्यासह प्रत्येक गावातील पोलीस पाटील, सरपंच, ग्रामपंचायत सदस्य, आशा स्वयंसेविका, अंगणवाडी सेविका, मदतनीस यांनी सहकार्य केले. सूत्रसंचालन तथा आभार आरोग्य सेवक रवींद्र सूर्यवंशी यांनी मानले.
