साईमत, पाचोरा : प्रतिनिधी
येथील मुख्याधिकारी शोभा बाविस्कर यांची शासनाच्या आदेशानुसार धुळे उपायुक्तपदी नुकतीच बदली केली आहे. याबद्दल त्यांचा शुक्रवारी, ९ फेबु्रवारी रोजी नगरपरिषदेच्या अधिकाऱ्यांसह कर्मचाऱ्यांकडून निरोप समारंभ उत्साहात पार पडला. यावेळी त्यांचा नगरपालिकेत उपस्थित मान्यवरांनी पुष्पगुच्छ देऊन सत्कार केला. अध्यक्षस्थानी प्रभारी मुख्याधिकारी रवींद्र लांडे होते. चार वर्षाच्या कार्यकाळात त्यांनी अनेक विकासकामे केली. शहरातील बेशिस्त असलेल्या हातगाड्यांना शिस्त लावण्याचे काम त्यांनी केले.
सत्काराला उत्तर देतांना मुख्याधिकारी बाविस्कर म्हणाल्या की, शहरातील स्वच्छता, आरोग्य आदी कामे करण्यास प्राधान्य दिले. नगरपरिषदेच्या सर्व अधिकाऱ्यांसह कर्मचाऱ्यांनी कामात नेहमी सहकार्य केले. त्याचप्रमाणे शहराचा विकास करण्यासाठी रस्ते, खुल्या जागा, पथदिवे आदी विकास कामे करण्याकरीता आमदार किशोर पाटील, नगराध्यक्ष गोहील, सर्व पक्षीय नेते, प्रमुख पदाधिकारी यांनीही सहकार्य केले. त्यामुळेच चार वर्षाचा यशस्वी कार्यकाळ पूर्ण करु शकले. यावेळी कोवीड आजाराच्या पार्श्वभुमीवर केलेले काम सदैव स्मरणात राहील, असे म्हणतांना त्या भावूक झाल्या होत्या. अनेक कर्मचाऱ्यांनी आपल्या भावना शब्दातून व्यक्त केल्या. तसेच मनोगत व्यक्त करतांना कर्मचारीही भावूक झाल्याचे दिसून आले.
यावेळी प्रभारी मुख्याधिकारी रवींद्र लांडे, उपमुख्याधिकारी दुर्गेश सोनवणे, करनिरीक्षक दगडू मराठे, अंतर्गत लेखापरीक्षक नितीन लोखंडे, संगणक अभियंता भारती निकुंभ, पाणी पुरवठा अभियंता जितेंद्र मोरे, आरोग्य निरीक्षक विरेंद्र घारु, भांडारपाल प्रगती खडसे, अर्जुन भोळे, लिपीक ललित सोनार, विशाल दिक्षीत, विलास देवकर, प्रकाश पवार, प्रकाश गोसावी, विजेंद्र निकम, मनोज पाटील, राजेश कंडारे, नरेश आदिवाल, गोपाल लोहार, किशोर मराठे, विलास कुंभार, गणेश अहिरे आदी कर्मचारी उपस्थित होते.
