नवीदिल्ली : वृत्तसंस्था
टी-२० वर्ल्डकपचे वेळापत्रक आता जाहीर करण्यात आले आहे. या वर्ल्ड कपमध्ये भारत आणि पाकिस्तान यांच्यातील सामना नेमका कधी आणि कुठे होणार आहे हे आता स्पष्ट झाले आहे. टी-२० वर्ल्ड कप हा १ जूनपासून सुरु होणार आहे. हा वर्ल्ड कप वेस्ट इंडिज आणि अमेरिका या दोन्ही देशांत संयुक्यरीत्या खेळवण्यात येणार आहे. या वर्ल्ड कपमध्ये भारताचा पहिला सामना हा आयर्लंडबरोबर होणार आहे.
भारत व आयर्लंड यांच्यातील लढत पाच जूनला होणार आहे. भारताचा या वर्ल्ड कपमधील दुसरा सामना हा पाकिस्तानबरोबर होणार आहे. ९ जूनला भारत व पाकिस्तान सामना होणार आहे. त्यानंतर १२ जूनला भारत अमेरिकेविरुद्ध खेळणार आहे. या तीन लढती न्यूयॉर्कला होणार असल्याचे आता स्पष्ट झाले आहे.
या लढतींचे संयोजन नसाऊ काऊंटी मैदानात होऊ शकेल. हे मैदान मॅनहटनपासून सुमारे ५० किलोमीटर दूर आहे.फ्लोरिडात १५ जूनला भारत आणि कॅनडा सामना रंगणार असल्याचे आता स्पष्ट झाले आहे. भारत आणि पाकिस्तानचा गट खूपच सोपा आहे.त्यामुळे दोन्ही संघ सहज अव्वल साखळीत खेळतील, असे स्पष्टपणे दिसत आहे. कारण भारत आणि पाकिस्तान या दोन्ही संघांना आयर्लंड, कॅनडा आणि अमेरिका या तीन संघांना पराभूत करायचे आहे. हे तिन्ही संघ सध्याच्या घडीला चांगल्या फॉर्मात नाहीत आणि ते प्रस्थापितही नाहीत. त्यामुळे भारत आणि पाकिस्तान या दोन्ही संघांसाठी ही फेरी सोपी असणार आहे.भारताच्या लढती वेस्ट इंडिजलाही आपली आर्थिक स्थिती सुधारण्यासाठी हव्या आहेत. त्यामुळे भारताच्या दुसऱ्या टप्प्याच्या लढती वेस्ट इंडिजमध्ये होतील. या लढती बार्बाडोस, अँटिग्वा आणि सेंट ल्युसिया येथे होणार आहे. या लढती बहुदा २०, २२ आणि २४ जूनला होतील. यावेळी भारताचे प्रतिस्पर्धी न्यूझीलंड, श्रीलंका आणि ऑस्ट्रेलियाविरुद्ध खेळण्याची शक्यता आहे. मात्र या कार्यक्रमाला अद्याप प्रसारणाचे हक्क असलेल्या टीव्ही वाहिनीने तसेच भारतीय क्रिकेट बोर्डाने मान्यता दिलेली नाही, असे सांगितले जात आहे, त्यामुळे या स्पर्धेचा कार्यक्रम तयार असूनही जाहीर झालेला नाही असे सांगितले जात आहे.
या वर्ल्ड कपसाठी सर्व संघांनी आतापासून जोरदार तयारी सुरु केली आहे. भारतीय संघ काही दिवसांनी अफगाणिस्तानशी दोन हात करणार आहे पण त्यानंतर मात्र ते एकही टी-२० मालिका खेळणार नाहीत.
