जळगाव जनता सहकारी बँकेतील कर्मचाऱ्याने केला २६ लाखांचा अपहार

चाळीसगाव : प्रतिनिधी
येथील जळगाव जनता सहकारी बँकेतील चाळीसगाव शाखेत सहाय्यक पदावर असलेल्या कर्मचाऱ्याने बँकेतील खातेदारांच्या खात्यातून बनावट स्लिप भरून विड्रॉल केले, तसेच बनावट मुदत ठेव पावती करून २६ लाख २४ हजार रुपयांचा अपहार केला. पोलिसांनी गुन्हा दाखल करुन बँक कर्मचाऱ्याला अटक केली आहे.
याबाबत पोलीस सूत्रांकडून मिळालेल्या माहितीनुसार, जळगाव जिल्ह्यातील नामांकित बँक असलेल्या जळगाव जनता सहकारी बँकेच्या चाळीसगाव शाखेमध्ये २६ सप्टेंबर २०२० ते १२ मे २०२३ या कालावधीमध्ये बँकेतील सहाय्यक देविदास खंडू थोरात यांनी या काळात बँकेचे खातेदार सुमन भिकन कोतकर, उज्वला जयवंत कोतकर, जयवंत भिकन कोतकर यांच्या खात्यातून बनावट स्लिप भरून विड्रॉल केले व तेथेच बनावट मुदत ठेव पावती करून २६ लाख २४ हजार रुपयांचा अपहार केला. बँकेने ठेवलेल्या मौल्यवान व दस्तावेज मुदत ठेव पावतीची चोरी करून त्याचे बनावटीकरन करून खातेदारांची फसवणूक केली. या प्रकरणी भास्कर निंबाजी साळुंखे (रा. नाशिक) यांनी दिलेल्या फिर्यादीवरून चाळीसगाव पोलिसांमध्ये फसवणुकीचा गुन्हा दाखल करण्यात आला
आहे.
संशयित आरोपी देविदास खंडू थोरात यांना अटक करण्यात आली आहे. पुढील तपास पोलीस उपनिरीक्षक योगेश माळी हे करीत आहे.