साईमत, लोहारा, ता.पाचोरा : वार्ताहर
येथील ग्रामपंचायत आणि श्रीराम मंदिर जवळील रस्त्यावर घाणीचे साम्राज्य पसरले आहे. ग्रामपंचायत आणि मंदिरासमोरील रस्ता जणू कचरा स्टोरेज झाला आहे की काय? असा प्रश्न नागरिकांमधून उपस्थित होत असून तीव्र संताप व्यक्त होत आहे.
परिसरात कचराकुंडी नसल्यामुळे परिसरातील जनता रस्त्यावरील जागेत कचरा टाकतात. ग्रामपंचायत समोरील गटारी तुडुंब भरलेल्या असतात. रस्त्यावरून सरकारी दवाखाना, मराठी मुलींची शाळा, माध्यमिक विद्यालय, पोलीस दुरुक्षेत्र असल्याने रस्ता नेहमी रहदारीचा असतो. परंतु आता रस्त्याने आपण पायी सुद्धा जाऊ शकत नाही, अशी परिस्थिती पाण्यामुळे निर्माण झाली आहे. पाणी नसल्यावरही याठिकाणी नेहमीच घाणीचे साम्राज्य असते. ते पार केल्यानंतरच पुढील कामाची दिशा मिळते. याठिकाणी मोकाट डुकरे, कुत्रे, गुरे यांचे वास्तव्य वाढल्याने मंदिराचे एक गेट नेहमी बंद ठेवावे लागते. त्यामुळे ग्रामपंचायतीने काळजीपूर्वक लक्ष देऊन स्वच्छता करावी, अशी मागणी ग्रामस्थांमधून जोर धरत आहे.
